فضائی سفر کے دوران مسافر محدود سی جگہ پر بیٹھ کر تھک جاتے ہیں لیکن ان کے پاس باہر نکلنے کا کوئی موقع نہیں ہوتا اس لیے صبر و تحمل سے جہاز کے رن وے پر اترنے اور باہر جانے کی اجازت کے منتظر رہتے ہیں۔
مگر یوکرین میں ایک خاتون مسافر سے صبر نہ ہو سکا اور انہوں نے رن وے پر اترنے کے بعد جہاز کے دروازے کھلنے کا انتظار کرنے کے بجائے ایمرجنسی ایگزٹ کھول کر جہاز کے ایک پر پہ چہل قدمی شروع کر دی۔
ایک منٹ طویل ویڈیو سوشل میڈیا پر وائرل ہو گئی ہے جس میں سفید لباس میں ملبوس ایک خاتون رن وے پر کھڑے طیارے کے پر پہ چہل قدمی کر رہی ہے۔ نیچے کھڑے حیرت زدہ لوگوں نے دھڑادھڑ ان کی تصاویر اور ویڈیوز بنانا شروع کر دیں۔
بعد ازاں جہاز کے عملے نے انہیں واپس بلایا تو وہ پر سے اتر کر ایمرجنسی ایگزٹ کے راستے واپس طیارے میں چلی گئیں، ان کی شناخت ظاہر نہیں کی گئی۔
یہ مسافر یوکرین انٹرنیشنل ایئرلائنز (یو آئی اے) کی پرواز پر سفر کر رہی تھیں جو اناطولیہ سے یوکرین کے دارالحکومت جا رہی تھی، ان کے شوہر اور بچے بھی ساتھ تھے۔
جہاز کے اندر بیٹھے لوگوں نے بتایا کہ خاتون بار بار گرمی کی شکایت کر رہی تھیں اور وہ خود کو ٹھنڈا کرنا چاہتی تھیں۔
اس غیرقانونی حرکت پر یو آئی اے کی انتظامیہ نے ان پر تاحیات اپنی ایئرلائن پر سفر کرنے پہ پابندی عائد کر دی ہے۔
اپنے بیان میں انتظامیہ نے کہا کہ ایئرپورٹ سیکیورٹی، پولیس اور ڈاکٹرز نے خاتون کا خیال رکھا، ٹیسٹ کے بعد معلوم ہوا کہ انہوں نے کسی قسم کا الکوحل استعمال نہیں کیا تھا۔
