بلوچستان میں ضلع کیچ کے علاقے تربت میں فائرنگ کر کے ایک خاتون شاہینہ شاہین کو قتل کر دیا گیا ہے، وہ پی ٹی وی میں اینکر کے طور پر کام کرتی تھیں۔
پولیس کا کہنا ہے کہ ایک نامعلوم شخص خاتون اینکر کو شدید زخمی حالت میں اسپتال لایا تھا جہاں وہ جانبر نہ ہو سکیں۔ انہیں اسپتال پہنچانے والا شخص اپنی گاڑی چھوڑ کر فرار ہو گیا، پولیس نے گاڑی قبضے میں لے کر تحقیقات شروع کر دی ہیں۔
پولیس کا کہنا ہے کہ مقتولہ کو 2 گولیاں لگی ہیں جس سے وہ شدید زخمی ہو گئیں اور ڈاکٹروں کی پوری کوشش کے باوجود ان کی جان نہ بچائی جا سکی۔
شاہینہ شاہین کا تعارف بلوچستان کی ایک آرٹسٹ اور دانشور کے طور پر بھی ہے، وہ مصوری کیا کرتی تھیں اور ایک بلوچی میگزین کی مدیر تھیں۔
پولیس کا خیال ہے کہ یہ واقعہ ممکنہ طور پر گھریلو تنازعہ پر پیش آیا ہے تاہم ابھی تک اس حوالے سے کوئی پیش رفت سامنے نہیں آئی۔
مقتولہ کے اہلخانہ نے بھی اب تک پولیس کو کوئی درخواست نہیں دی اور نہ ہی کوئی بیان ریکارڈ کرایا ہے۔
