سندھ، پنجاب میں تعلیمی ادارے مرحلہ وار کھولنے کا اعلان، شیڈول جاری

سندھ اور پنجاب کی حکومتوں نے تعلیمی ادارے مرحلہ وار کھولنے کا اعلان کرتے ہوئے شیڈول جاری کر دیا ہے۔

سندھ میں تعلیمی ادارے کھولنے کا شیڈول

سندھ کے وزیرتعلیم سعید غنی کے ترجمان کا کہنا ہے کہ 15 ستمبر سے 9 ویں جماعت سے اوپر کی کلاسز اور جامعات کھول دی جائیں گی جبکہ 22 ستمبر سے چھٹی سے آٹھویں تک کی جماعتوں تعلیم شروع ہو جائے گی۔

ترجمان کے مطابق 30 ستمبر سے پری پرائمری اور پرائمری کلاسز کھولی جائیں گی۔

ان کا کہنا تھا کہ جس علاقے میں کورونا بڑھے گا وہاں کے اسکول بند کر دیے جائیں گے، ماسک کا استعمال لازمی ہو گا جبکہ ایس او پیز پر عمل نہ کرنے پر کارروائی عمل میں لائی جائے گی۔

پنجاب میں تعلیمی ادارے کھولنے کا شیڈول

پنجاب بھر میں تعلیمی ادارے کھولنے کا شیڈول جاری کر دیا ہے جس کے مطابق 15 ستمبر سے مرحلہ وار اسکول کھولے جائیں گے۔

وزیرتعلیم پنجاب مراد راس نے بتایا کہ اسکولوں میں دو شفٹیں چلانے کی اجازت نہیں ہو گی، تمام جماعتوں کے طلبہ کو متبادل دنوں میں بلایا جائے گا۔

ان کا کہنا تھا کہ تمام اسکولوں کے لیے حکومتی ہدایات پر عملدرآمد یقینی بنانا لازمی ہو گا۔