‘ویڈیو گیمز کھیلنے سے بچوں میں خواندگی، ذہنی صحت میں اضافہ ہوتا ہے’

برطانیہ میں ہونے والے ایک سروے میں یہ بات سامنے آئی ہے کہ ویڈیو گیمز کھیلنے سے بچوں کی ذہنی صحت، خواندگی اور کمیونی کیشن کی صلاحیت میں اضافہ ہوتا ہے۔

نیشنل لٹریسی ٹرسٹ نے نومبر اور دسمبر 2019 کے دوران پورے ملک میں یہ سروے کیا جس میں 11 سے 16 سال کے 4626 بچوں کا انٹرویو کیا گیا۔

35.3 فیصد بچوں کا کہنا تھا کہ ویڈیو گیمز سے ان کی پڑھنے کی صلاحیت بہتر ہوئی ہے، 62.5 فیصد نے بتایا کہ وہ مہینے میں ایک بار گیمز سے متعلق بلاگ یا کہانیاں لکھتے ہیں اور ان کی تحریر کی صلاحیت میں اضافہ ہوا ہے۔

ریسرچرز کے مطابق آن لائن گیمز کی کمیونٹی مختلف کلچرز سے تعلق رکھنے والے افراد کو قریب لاتی ہے۔

76.3 فیصد افراد نے بتایا کہ وہ اپنے دوستوں کے ساتھ ویڈیو گیمز کے متعلق گفتگو کرتے ہیں جبکہ 29.4 کا کہنا تھا کہ وہ کتابوں کے متعلق گفتگو کرتے ہیں۔

ریسرچز نے یہ بھی بتایا کہ ویڈیو گیمز کئی نوعمر بچوں کو آن لائن اور حقیقی زندگی میں روابط قائم کرنے میں مدد دیتی ہیں۔ اسی طرح بہت سے بچے ویڈیو گیمز کے ذریعے ذہنی دباؤ اور مشکل جذبات سے فرار حاصل کرتے ہیں۔

ریسرچ کرنے والی ماہر نفسیات ریچل کوورٹ نے سی این این سے بات کرتے ہوئے کہا کہ گیمز سماجی رابطے قائم کرنے کے لیے اچھا طریقہ ہیں اور یہ مشترکہ کمیونٹی تعاون اور مقابلے کو فروغ دیتی ہے۔

عالمی ادارہ صحت نے بھی کورونا کا پھیلاؤ روکنے کے لیے ویڈیو گیمز کھیلنے کی حوصلہ افزائی کی ہے، گیمز کی 18 کمپنیوں نے مل کر اس حوالے سے ایک مہم بھی چلائی تھی جس کا مقصد وبا کے دوران گھر تک محدود رہ کر سماجی فاصلہ قائم رکھنا تھا۔