خیبر پختونخوا کے ضلع مہمند میں ماربل کی کانیں بیٹھ گئی ہیں جس سے 19 مزدور جاں بحق ہو گئے ہیں۔
پی ڈی ایم اے کے ڈائرکٹرجنرل نے اپنے بیان میں بتایا ہے کہ ملبے تلے دبے ہوئے مزدوروں کو باہر نکالنے کے لیے کوششیں جاری ہیں، 5 ایمبولینسیں اور ملبہ ہٹانے والی مشینری پشاور سے بھجوا دی گئی ہے۔
ضلعی پولیس کے سربراہ طارق حبیب نے رائٹرز کو بتایا کہ پیر کی شام کانوں میں 40 سے 50 کے درمیان مزدور کام کر رہے تھے، عموماً بڑی تعداد میں لوگ کام کر رہے ہوتے ہیں لیکن شام ہونے کے باعث اکثریت اپنے گھروں میں واپس چلی گئی تھی۔
ڈی پی او کے مطابق ملبہ بہت زیادہ ہے، ہیوی مشینری نہ ہونے کی وجہ سے دشواری کا سامنا ہے۔
مقامی افراد کا کہنا ہے کہ کم از کم 25 افراد لاپتہ ہیں، دوردراز کا علاقہ ہونے کے باعث یہاں نہ ہی انٹرنیٹ کی سہولت موجود ہے اور نہ ہی موبائل فون کام کرتے ہیں۔
