جنگ جیو گروپ کے مالک میر شکیل الرحمن نے ضمانت کیلئے سپریم کورٹ سے رجوع کر لیا ہے۔
انہوں نے لاہور ہائیکورٹ کے فیصلے کیخلاف سپریم کورٹ میں درخواست دائر کی ہے جس میں استدعا کی گئی ہے کہ لاہور ہائیکورٹ کا 8 جولائی کا فیصلہ کالعدم قرار دیا جائے۔
انہوں نے سپریم کورٹ سے استدعا کی ہے کہ طبی بنیادوں پر ضمانت بعد از گرفتاری کی درخواست منظور کی جائے۔
انہوں نے درخواست میں کہا ہے کہ عدالت کو یقین دلاتا ہوں کہ تفتیش میں تعاون کروں گا، نیب نے غیر قانونی طور پر گرفتار کیا۔
درخواست میں کہا گیا ہے کہ میر شکیل مختلف پیچیدہ بیماریوں کا شکار ہیں، پراپرٹی کے 34 سال پرانے کیس میں ریفرنس دائر نہیں کیا جا سکتا، جنگ اور جیو کو نیب کارگردگی پر بات کرنے سے پیمرا نے روکنے کی کوشش کی۔
انہوں نے مزید کہا ہے کہ درخواست گزار کو میڈیا انڈسٹری کیلئے عبرتناک مثال بنایا جا رہا ہے، 12 مارچ سے قید میں رکھ کر بنیادی حقوق کی خلاف ورزی کی جا رہی ہے، لاہور ہائیکورٹ نے قانون اور حقائق کا درست جائزہ نہیں لیا۔
درخواست میں وفاقی حکومت، نیب، ڈی جی نیب لاہور اور تفتیشی افسر کو فریق بنایا گیا ہے۔
