امریکہ کے سابق صدر جمی کارٹر نے ایک نئی دستاویزی فلم میں انکشاف کیا ہے کہ ان کے تین بیٹوں میں سے ایک نے اس وقت کے معروف گلوکار ولی نیلسن کے ساتھ وائٹ ہاؤس کی چھت پر نشہ کیا تھا۔
جمی کارٹر کے میوزک انڈسٹری کے ساتھ تعلق کے متعلق بنائی گئی اس دستاویزی فلم کے ٹریلر میں انہوں نے کہا کہ ولی نیلسن نے اپنی سوانح عمری میں اعتراف کیا ہے کہ انہوں نے وائٹ ہاؤس میں نشہ کیا تھا۔
سابق امریکی صدر نے کہا کہ ولی نیلسن نے اپنی سوانح عمری میں وائٹ ہاؤس کے ایک ملازم کے ساتھ نشہ کرنے کا ذکر کیا ہے مگر یہ بات درست نہیں ہیں، حقیقت یہ ہے کہ وہ میرا ایک بیٹا تھا جس کے ساتھ مل کر انہوں نے میروانا کا نشہ کیا تھا۔
95 سالہ جمی کارٹر نے یہ نہیں بتایا کہ ان کے کون سے بیٹے نے اپنے وقت کے لیجنڈ گلوکار کے ساتھ نشہ کیا تھا۔
تاہم ایل اے ٹائمز کے مطابق ان کے بیٹے چپ کارٹر سے اس حوالے سے سوال کیا گیا تو انہوں نے کچھ توقف کے بعد کہا کہ اگر آپ میرے اور ولی نیلسن کے متعلق بات کر رہے ہیں تو وہ میرے دوست تھے۔
یہ ایک طرح سے ان کا مبہم انداز میں اعتراف تھا جس میں کھل کر تسلیم نہیں کیا گیا۔
13 ستمبر 1980 میں جب جمی کارٹر اور رونالڈ ریگن کے درمیان انتخابی معرکہ عروج پر تھا تو ولی نیلسن مختصر وقت کے لیے وائٹ ہاؤس آئے تھے۔
انہوں نے بتایا کہ میں نے کہا اوپر چلتے ہیں اور ہم سیڑھیوں سے ہوتے ہوئے چھت پر پہنچ گئے اور وہاں بیٹھ کر نشہ کیا تھا۔
یہ دستاویزی فلم اس ہفتے تھیٹرز میں پیش کی جائے گی۔
