لاہور: حمزہ شہباز کو کورونا کے باعث بہتر علاج کے لیے جیل سے اسپتال منتقل کرنے کی درخواست وزارت داخلہ نے مسترد کر دی ہے۔
ڈپٹی سیکرٹری اطلاعات مسلم لیگ ن کے مطابق حمزہ شہباز کو علاج کے لیے اتفاق اسپتال منتقل کرنے کی درخواست کی گئی تھی، ان کی درخواست کے ساتھ میڈیکل رپورٹس بھی نتھی کی گئی تھیں مگر وزارت داخلہ نے اسے مسترد کر دیا ہے۔
حمزہ شہباز کورونا وائرس کا شکار، مریم، شہباز کی حکومت پر تنقید
رمضان شوگر ملز ریفرنس میں شہبازشریف، حمزہ شہباز پر فرد جرم عائد
احتساب عدالت نے سلمان شہباز کے ناقابل ضمانت وارنٹ گرفتاری جاری کر دیے
یاد رہے کہ گزشتہ روز حمزہ شہباز کا کورونا وائرس کا ٹیسٹ مثبت آیا تھا جس کے بعد ان کے والد اور مسلم لیگ (ن) کے صدر شہباز شریف نے عوام سے ان کی صحتیابی کی دعا کرنے کی درخواست کی تھی۔
انہوں نے حکومت پر سخت تنقید کرتے ہوئے کہا تھا کہ مشرف دور میں نیب مقدمات کا ڈٹ کر مقابلہ کرنے کے بعد حمزہ شہباز اب نیب نیازی گٹھ جوڑ کے سیاسی انتقام کا انتہائی جراتمندی و ثابت قدمی سے سامنا کر رہا ہے۔
وزیراعظم کے مشیر برائے احتساب اور امور داخلہ مرزا شہزاد اکبر نے شہباز شریف کے ٹویٹ کے جواب میں کہا تھا کہ حمزہ شہباز کسی سیاسی مقدمے میں نہیں بلکہ کرپشن کی وجہ سے جیل میں بند ہیں۔
ان کا کہنا تھا کہ حمزہ شہباز پر اربوں کی منی لانڈرنگ، اپنی جماعت کے لوگوں اور سرکاری ٹھیکوں میں کمیشن لینے کا الزام ہے، ان کی ضمانت ہائی کورٹ نے مسترد کر دی ہے۔
پاکستان مسلم لیگ (ن) کی نائب صدر مریم نواز نے الزام عائد کیا تھا کہ حکومت حمزہ شہباز کو ضروری میڈیکل سہولیات فراہم نہیں کر رہی۔
اپنے ایک ٹویٹ میں انہوں نے کہا تھا کہ حمزہ شہباز کو ایک سال سے زائد عرصے سے غیرمنصفانہ اور غیر قانونی طور پر جیل میں بند کیا ہوا ہے۔
