حکومت نے وزیراعظم کے پرنسپل سیکرٹری اعظم خان کو یواین او میں تعینات کرنے کا فیصلہ کر لیا ہے، وہ اقوام متحدہ میں پاکستان کے خصوصی مندوب ہوں گے۔
ذرائع کے مطابق چیف سیکرٹری خیبر پختونخوا کاظم نیاز وزیراعظم کے نئے پرنسپل سیکرٹری ہوں گے۔
ذرائع کا کہنا ہے کہ شکیل قادر کو خیبر پختونخواہ کا نیا چیف سیکرٹری تعینات کرنے کا فیصلہ کیا گیا ہے۔
اس کے ساتھ ساتھ حکومت نے پشاور سمیت متعدد اضلاع کے ڈپٹی کمشنرز تبدیل کرنے کا فیصلہ بھی کیا ہے، ناقص کارکردگی دکھانے والے ڈپٹی کمشنرز کو تبدیل کیا جا رہا ہے۔
یاد رہے کہ اعظم خان سے پاکستان تحریک انصاف کے کئی رہنماؤں کی شکایات سامنے آئی تھیں، جہانگیر خان ترین نے بھی وزیراعظم کے ساتھ تعلقات بگڑنے کی وجہ اعظم خان کو قرار دیا تھا۔
اسی طرح فردوس عاشق اعوان نے بھی اپنے استعفیٰ کے پیچھے انہیں کو مورد الزام ٹھہرایا تھا۔
اس سے قبل معروف صحافی رؤف کلاسرا اپنے ایک وی لاگ میں کہہ چکے ہیں کہ اعظم خان اپنی جگہ پنجاب سے کسی کو یہ عہدہ نہیں لینے دیں گے۔ ان کی یہ بات درست ثابت ہوئی اور وزیراعظم کے پرنسپل سیکرٹری کا عہدہ ایک بار پھر خیبرپختونخوا کے کاظم نیاز کے حوالے کرنے کا فیصلہ کیا گیا ہے۔
سینئر صحافی عامر متین نے بھی پروگرام میں کاظم نیاز کے حوالے سے بھی بات کی تھی کہ وہ پرنسپل سیکرٹری کی سیٹ کے لیے فیورٹ سمجھے جا رہے ہیں۔
