پی ٹی وی کا راشد محمود کو نیا چیک، اداکار کا چیک کو فریم کرانے کا اعلان

پاکستان ٹیلی وژن کی انتظامیہ نے سینئر اداکار راشد محمود کی ویڈیو سامنے آنے کے بعد ان سے معذرت کی ہے اور معاوضے کا ایک نیا چیک بھیجا ہے۔

راشد محمود نے گزشتہ دنوں انکشاف کیا تھا کہ 2 سال قبل محرم الحرام کے دنوں میں پی ٹی وی نے انہیں مرثیہ پڑھنے بلایا تھا جس کا چیک اب موصول ہوا ہے اور اس میں صرف 620 روپے کی رقم درج تھی۔

انہوں نے انتہائی دکھ اور برہمی کا اظہار کرتے ہوئے کہا تھا کہ وہ آئندہ پی ٹی وی کے لیے کام نہیں کریں گے۔

راشد محمود نے کہا تھا کہ ایسے لوگ پی ٹی وی پر 15 سے 25 لاکھ روپے وصول کر رہے ہیں جن کا شوبز کی دنیا سے کوئی تعلق نہیں ہے۔

ان کی ویڈیو منظرعام پر آنے کے بعد پی ٹی وی پر عوام نے بہت غصے کا اظہار کیا تھا، اس تنقید کے بعد پی ٹی وی انتظامیہ نے ان سے معذرت کر لی تھی اور کہا تھا کہ وہ چیک غلطی سے بھیجا گیا ہے۔

راشد محمود نے تصدیق کی تھی کہ ایم ڈی پی ٹی وی نے ان سے معذرت کی ہے۔

اب پاکستان ٹیلی وژن نے انہیں اضافی پیسوں کا نیا چیک جاری کیا ہے جس پر 9600 روپے کی رقم درج ہے۔

راشد محمود نے اس چیک کی تصویر سوشل میڈیا پر شیئر کی ہے اور واضح کیا ہے کہ وہ پی ٹی وی پر کام نہ کرنے کے فیصلے پر قائم ہیں۔

سینئر اداکار نے کہا کہ انہوں نے پی ٹی وی کی جانب سے بھیجے گئے دونوں چیک کیش نہیں کرائے، وہ انہیں فریم کرا کے ڈرائنگ روم میں یادگار کے طور پر سجائیں گے۔