کم عمر نوبل انعام یافتہ ملالہ یوسف زئی کو اقوام متحدہ کی عالمی مسائل پر بننے والی فلم میں شامل کر لیا گیا ہے۔
‘ارجنٹ سلوشن فار ارجنٹ ٹائمز’ نامی اس فلم میں دنیا کو درپیش مسائل اور ان کے حل کے متعلق بات ہو گی، اقوام متحدہ نے ملالہ یوسف زئی کے علاوہ معروف گلوگارہ بیونس سمیت دیگر مشہور شخصیات کو منتخب کیا ہے۔
اقوام متحدہ کے مطابق فلم میں ایک بہتر اور ترقی یافتہ دنیا کی تعمیر کے لیے درکار اقدامات کا تعین کیا گیا ہے، کورونا جیسی عالمی وبا بھی اس فلم میں ایک اہم موضوع ہو گا۔
اسی طرح انتہائی غربت کا خاتمہ، جنسی امتیاز سے نجات، انسانی حقوق کی پاسداری، ناانصافی میں کمی اور ماحولیاتی تبدیلیوں جیسے موضوعات بھی فلم کا حصہ ہوں گے۔
30 منٹ پر مشتمل اس فلم کا پریمیئر 19 ستمبر کو اقوام متحدہ کے یوٹیوب چینل پر پیش کیا جائے گا۔
فلم میں گلوکارہ بیونس، ڈان چیڈل، مشیل یہو، ملالہ یوسف زئی اور دیگر اہم شخصیات شامل ہوں گے، اقوام متحدہ کی ڈپٹی سیکرٹری جنرل آمنہ محمد اور سیکرٹری جنرل انتونیو گٹیرس بھی اس میں اپنی آرا کا اظہار کریں گے۔
اقوام متحدہ کے مطابق آسکر ایوارڈ یافتہ اداکارہ جولیا رابرٹس اس فلم کی ریڈیو نشریات اور پوڈ کاسٹ ورژن کی میزبانی کریں گی۔
