پاکستان مسلم لیگ (ن) نے کل جماعتی کانفرنس میں شرکت کے لیے 11 رکنی وفد کا اعلان کر دیا ہے۔
وفد کی قیادت قومی اسمبلی میں قائد حزب اختلاف اور ن لیگ کے صدر شہبازشریف کریں گے، مریم نواز بھی وفد کا حصہ ہوں گی۔
مسلم لیگ ن کے وفد میں سابق وزیر اعظم شاہد خاقان عباسی، خواجہ آصف، احسن اقبال اور ایاز صادق شامل ہوں گے، اس کے علاوہ پرویز رشید، سعد رفیق، رانا ثنا اللہ، امیر مقام اور مریم اورنگزیب بھی وفد کا حصہ ہوں گے۔
ذرائع کا کہنا ہے کہ آصف زرداری اورنوازشریف وڈیولنک کے ذریعے اے پی سی میں شریک ہونگے۔
یاد رہے کہ حزب اختلاف نے 20 ستمبر کو اے پی سی کا اعلان کر رکھا ہے جس میں حزب اختلاف کی تمام جماعتیں شریک ہوں گی اور ملک کی سیاسی صورتحال پر اہم فیصلے کیے جائیں گے۔
گزشتہ روز شاہد خاقان عباسی نے دعویٰ کیا تھا کہ آئندہ 3 ماہ کے اندر اسلام آباد کا گھیراؤ کیا جائے گا، اے پی سی میں اسلام آباد کو بند کرنے کی بات کی جائے گی۔
دوسری جانب وفاقی وزیرریلوے شیخ رشید بارہا کہہ چکے ہیں کہ اس اے پی سی سے کوئی نتیجہ نہیں نکلنا اور حزب اختلاف کا یہ اکٹھ ناکام ہو جائے گا۔
