نیشنل کمانڈ اینڈ آپریشن سینٹر (این سی او سی) نے کہا ہے کہ گزشتہ 48 گھنٹوں میں کورونا کے حوالے سے ایس او پیز پر عمل نہ کرنے پر ملک بھر میں 22 تعلیمی ادارے بند کر دیے گئے ہیں۔
این سی او اسی کے جاری کردہ اعلامیے کے مطابق خیبرپختونخوا میں 16، آزاد کشمیر میں 5 جبکہ اسلام آباد میں ایک تعلیمی ادارہ بند کیا گیا ہے۔
سندھ میں عملے کے 8 اراکین کا کرونا ٹیسٹ مثبت آنے کے بعد 2 کالج بند کر دیے گئے ہیں، سینیٹر سعید غنی کا کہنا ہے کہ دونوں کالج ضلع مٹیاری میں تھے۔
اسی طرح ضلع جامشورو میں بھی عملے کا کورونا ٹیسٹ مثبت آنے پر ایک کالج کو بند کر دیا گیا ہے۔
یاد رہے کہ چند روز قبل اسلام آباد میں اساتذہ اور طلبہ میں کورونا کی تصدیق کے بعد ایک میڈیکل کالج کو بند کر دیا گیا تھا۔
وفاقی دارالحکومت کے ڈسٹرکٹ ہیلتھ آفیسر نے ایک خط کے ذریعے کہا تھا کہ یہ کالج کورونا کا ہاٹ اسپاٹ بن چکا ہے، اس لیے کیمپس اور اسپتال دونوں کو بند کر دیا جائے۔
حکومت کے تعلیمی ادارے کھولنے کے اعلان کے بعد جی 6 اور جی 7 میں قائم 2 سرکاری اسکولوں کے اساتذہ جبکہ ایچ 8 میں ایک نجی اسکول کے استاد میں کورونا وائرس کی تصدیق ہوئی تھی۔
حکومت کی جانب سے جاری کردہ ایس او پیز میں طلبہ کی تعداد میں کمی کرنا، کلاس رومز میں سماجی دوری کو یقینی بنانا، طلبہ اور اسکول کے عملے کا ماسک پہننا شامل ہیں۔
