سابق وزیراعظم نواز شریف نے سوشل میڈیا پر متحرک ہونے کا فیصلہ کر لیا ہے، انہوں نے ٹویٹر، یوٹیوب اور فیس بک اکاؤنٹس بنا لیے ہیں۔
مسلم لیگ (ن) کی نائب صدر مریم نواز نے اس کا اعلان کرتے ہوئے کہا کہ مجھے یہ بتاتے ہوئے خوشی محسوس ہو رہی ہے کہ پاکستانی عوام کے ساتھ رابطے میں رہنے کے لیے نواز شریف نے ٹوئٹر جوائن کرنے کا فیصلہ کیا ہے۔
انہوں نے اپنے ٹویٹ میں نوازشریف کا ٹویٹر ہینڈل بھی شیئر کیا ہے۔
سابق وزیرخزانہ اسحاق ڈار کے صاحبزادے علی ڈار نے اپنی ٹویٹ میں بتایا ہے کہ نوازشریف نے ٹویٹر کے ساتھ ساتھ فیس بک اور یوٹیوب پر بھی متحرک ہونے کا فیصلہ کر لیا ہے۔
یاد رہے کہ آل پارٹیز کانفرنس میں نوازشریف کا خطاب سوشل میڈیا کے ذریعے براہ راست دکھانے کا فیصلہ کیا گیا ہے جس پر حکومتی عہدیداروں نے شدید ردعمل کا اظہار کیا ہے۔
ٹوئٹر پر اپنے ایک پیغام میں ن لیگ کی نائب صدر مریم نواز کا کہنا تھا کہ پارٹی کارکنان نے نوازشریف کا اے پی سی سے خطاب سوشل میڈیا پر لائیو چلانے کا مطالبہ کیا تھا۔
مریم نواز کا کہنا تھا کہ سول نافرمانی کی تلقین کرنے والوں کو نواز شریف نے روکا نہ پیمرا کو استعمال کیا گیا۔ اب جب نواز شریف بولنے لگا ہے تو کیوں جان پر بن گئی ہے؟ نوازشریف کی آواز گھر گھر گونجے گی ،روک سکو تو روک لو!
