پاکستان میں کورونا ویکسین کی تیاری کے تیسرے مرحلے کا آغاز ہو گیا ہے، وفاقی وزیر منصوبہ بندی اسد عمر نے ویکسین کے فیز تھری کا افتتاح کیا۔
انہوں نے بتایا کہ یہ ویکسین ایک چینی کمپنی تیار کر رہی ہے، اس کے تیسرے آزمائشی مرحلے میں 7 ممالک سے تعلق رکھنے والے 40 ہزار افراد رضاکارانہ طور پر شریک ہوں گے۔
اسد عمر کے مطابق ان رضاکاروں میں 8 سے 10 ہزار پاکستانی ہوں گے، ٹرائل کے نتائج آنے میں 4 سے 6 ماہ لگیں گے۔
یاد رہے کہ گزشتہ 24 گھنٹوں کے دوران 36 ہزار 155 ٹیسٹ کیے گئے ہیں جن میں 582 افراد کے ٹیسٹ مثبت آئے ہیں جبکہ 4 افراد جاں بحق ہو گئے ہیں
ملک بھر میں اب تک 3 لاکھ 6 ہزار 886 افراد کورونا سے متاثر ہوچکے ہیں جبکہ اموات کی تعداد 6424 تک پہنچ گئی ہے۔
اب تک 2 لاکھ 93 ہزار 159 افراد صحتیاب ہو چکے ہیں جبکہ فعال کیسزکی تعداد 7 ہزار 303 تک پہنچ گئی ہے۔
یاد رہے کہ فعال کیسز گزشتہ ہفتے ساڑھے 5 ہزار تک پہنچ گئے تھے مگر اس کے بعد کورونا کیسز میں اضافہ دیکھنے میں آیا ہے۔
وزیراعظم عمران خان نے بھی کورونا کی دوسری لہر کا خدشہ ظاہر کیا تھا اور کہا تھا کہ اس سے بچنے کے لیے احتیاطی تدابیر جاری رکھی جائیں۔
ملک میں کورونا کے مریضوں کے لیے مختص ایک ہزار 912 ونٹی لیٹرز میں سے صرف 106 پر مریض موجود ہیں۔
