وزیراعظم عمران خان نے اقوام متحدہ کی جنرل اسمبلی اجلاس کے موقع پر پینل مباحثے سے خطاب کرتے ہوئے کہا ہے کہ وائٹ کالر کرائم کے ذریعے ہر سال ایک کھرب ڈالرز کی منتقلی کی جاتی ہے۔
ویڈیو لنک کے ذریعے خطاب کرتے ہوئے ان کا کہنا تھا کہ عالمی برادری کو رقوم کی غیر قانونی منتقلی کے معاملے پر مؤثر اقدامات کرنے چاہئیں۔
وزیراعظم نے کہا کہ ایسے قوانین بننے چاہئیں جن سے ترقی پذیر ممالک کا پیسہ واپس آئے۔
انہوں نے مطالبہ کیا کہ غریب اور ترقی پذیر ممالک سے لوٹی گئی رقم واپس کی جائے۔ ان کا کہنا تھا کہ ہماری حکومت کو فنانشنل کرائمز ختم کرنے کا مینڈیٹ ملا ہے۔
عمران خان نے کہا کہ عالمی برادری کو منی لانڈرنگ کے خلاف اقدامات کرنے چاہئیں۔ ترقی پذیر ممالک کورونا وائرس کی وجہ سے شدید متاثر ہوئے ہیں۔
انہوں نے اپنے خطاب میں واضح کیا کہ مؤثر اقدامات کیے بغیر امیر اور غریب کے درمیان فرق بڑھتا جائے گا۔ انہوں نے غیر منصفانہ سرمایہ کاری معاہدوں کو منصفانہ بنانے کی اہمیت پر بھی زور دیا۔
وزیراعظم عمران خان کا ویڈیو لنک خطاب کے ذریعے کہنا تھا کہ غیر قانونی رقوم کی منتقلی کی روک تھام کے لیے اقوام متحدہ کو لائحہ عمل بنانا ہوگا۔ انہوں نے کہا کہ یو این کو غیر قانونی رقوم منتقلی روکنے کے لیے اقدامات کرنا ہوں گے۔
ہم نیوز کے مطابق وزیراعظم عمران خان نے اپنے خطاب میں خبردار کیا کہ دنیا میں بڑھتی غربت سے عالمی برادری کو خطرہ ہے۔ ان کا کہنا تھا کہ ملٹی نیشنل کمپنیز کے ٹیکس چوری کے اقدامات روکے جائیں۔
