سابق وزیراعظم نوازشریف نے مسلم لیگ (ن) کے رہنماؤں کو ہدایت کی ہے کہ وہ عسکری قیادت سے کسی بھی سطح پر ملاقات نہ کریں۔
آرمی چیف کی سیاسی رہنماؤں سے ملاقات کی اندرونی کہانی
نواز شریف کے کسی نمائندے نے آرمی چیف سے ملاقات نہیں کی، مریم نواز
ڈی جی آئی ایس پی آر نے ن لیگی رہنما محمد زبیر کی آرمی چیف سے 2 ملاقاتوں کی تصدیق کر دی
ٹویٹر پر مختلف ٹویٹس میں انہوں نے کہا کہ ‘حالیہ واقعات سے ایک بار پھر ثابت ہوتا ہے کہ کس طرح بعض ملاقاتیں سات پردوں میں چھپی رہتی ہیں اور کس طرح بعض کی تشہیر کرکے مرضی کے معنی پہنائے جاتے ہیں، یہ کھیل اب بند ہوجانا چاہیے۔’
انہوں نے اپنی جماعت کو ہدایات جاری کرتے ہوئے کہا کہ آئین پاکستان کے تقاضوں اور خود مسلح افواج کو اپنے حلف کی پاسداری یاد کرانے کے لیے آئندہ ہماری جماعت کا کوئی رکن انفرادی، جماعتی یا ذاتی سطح پر عسکری اور متعلقہ ایجنسیوں کے نمائندوں سے ملاقات نہیں کرے گا۔
ان کا کہنا تھا کہ ‘قومی دفاع اور آئینی تقاضوں کے لیے ضروری ہوا تو جماعتی قیادت کی منظوری کے ساتھ ایسی ہر ملاقات اعلانیہ ہوگی اور اسے خفیہ نہیں رکھا جائے گا۔’
یاد رہے کہ ڈی جی آئی ایس پی آر نے ن لیگی رہنما محمد زبیر کی آرمی چیف سے 2 ملاقاتوں کی تصدیق کرتے ہوئے کہا تھا کہ انہوں نے مریم نواز اور نواز شریف کے متعلق بات کرنے کے لیے ملاقاتیں کی تھیں۔
ان کا کہنا تھا کہ دونوں ملاقاتیں محمد زبیر کی درخواست پر ہی ہوئیں جس میں ڈی جی آئی ایس آئی لیفٹیننٹ جنرل فیض حمید بھی موجود تھے۔
ڈی جی آئی ایس پی آر کے مطابق پہلی ملاقات اگست کے آخری ہفتے میں اور دوسری 7 ستمبر کو ہوئی تھی۔
انہوں نے بتایا کہ آرمی چیف نے محمد زبیر کو واضح انداز میں کہا تھا کہ قانونی مسائل عدالتوں اور سیاسی مسائل پارلیمنٹ میں حل ہوں گے۔
