ایف آئی اے نے کراچی میں منی لانڈرنگ میں ملوث ایک اور بہت بڑا نیٹ ورک پکڑ لیا۔ بھاری مقدار میں سونا اور غیر ملکی کرنسی برآمد کر لی گئی۔
ایف آئی اے نے کراچی میں شہید ملت روڈ پر ایک رہائشی عمارت پر چھاپا مارا جہاں منی لانڈرنگ کا ایک بڑا نیٹ ورک فعال تھا۔
ڈائریکٹر ایف آئی اے منیر شیخ کے مطابق یہ چھاپہ ایک گرفتار ملزم عبدالجبار میمن کی نشاندہی پر مارا گیا، اس کارروائی کے دوران بڑی مقدار میں سونا اور غیر ملکی کرنسی برآمد ہوئی۔
دوران کارروائی ایسی دستاویزات بھی ملیں جو مختلف گھروں اور گاڑیوں سے تعلق رکھتی ہیں۔
اس کارروائی سے متعلق ایف آئی اے کے ڈائریکٹر کا کہنا ہے کہ تقریبا 15 کروڑ مالیت کی کرنسی کے ساتھ ساتھ 14 کروڑ روپے سے زائد کا سونا بھی پکڑا گیا ہے۔
ملزم سے ڈالر، پاؤنڈ، ریال، درہم اور دیگر ملکوں کی کرنسی برآمد ہوئی ہے، برآمد سامان میں کمپیوٹر، گاڑیوں کی رجسٹریشن بُکس اور پراپرٹی دستاویز بھی شامل ہیں۔
یاد رہے کہ 2 ماہ قبل جولائی میں فیڈرل انویسٹی گیشن ایجنسی (ایف آئی اے) نے کراچی میں کھارادار کے علاقے میں کارروائی کے دوران حوالہ ہنڈی کا کام کرنے والے بڑے نیٹ ورک کو پکڑا تھا، اور دو ملزمان گرفتار کیے گئے تھے جن کے قبضے سے 92 لاکھ روپے نقد اور 5 قیمتی موبائل فون برآمد کیے گئے تھے۔
ڈائریکٹر ایف آئی اے سندھ کا کہنا تھا کہ ملزمان حوالہ ہنڈی کا وسیع نیٹ ورک چلا رہے تھے، جنھوں نے مختلف ذرائع استعمال کرتے ہوئے کروڑوں کی منی لانڈرنگ کی، ملزمان کے دیگر ساتھیوں کی گرفتاری کے لیے چھاپے بھی شروع کیے گئے تھے۔
