لاہور پولیس کے سربراہ محمد عمر شیخ نے شہری پر تشش کرنے اور اس کی عزت نفس مجروح کرنے والے اہلکاروں کے خلاف مقدمہ درج کرا دیا۔
فارن افیئرز آفس کے باہر سیکیورٹی ڈیوٹی پر تعینات اہلکاروں نے ایک شہری ڈاکٹر نعمان کو تشدد کا نشانہ بنایا تھا جس پر سی سی پی او نے واقعہ کا نوٹس لیتے ہوئے فوری انکوائری کا حکم دیا تھا۔
ایس پی سیکیورٹی تھری قاسم خان اور ایس پی سیکیورٹی ہیڈکوارٹرز خالد محمود نے انکوائری کی، ابتدائی رپورٹ میں ہیڈ کانسٹیبل گلفام اور کانسٹیبل اسلام قصوروار قرار پائے گئے۔
انکوائری میں یہ بات سامنے آئی کہ دونوں اہلکاروں نے اختیارات سے تجاوز کرتے ہوئے شہری کی عزت نفس کو مجروح کیا اور انہیں حبس بے جا میں رکھا۔
قصور وار ٹھہرنے پر دونوں اہلکاروں کے خلاف تھانہ شادمان میں مقدمہ درج کر کے انہیں گرفتار کر لیا گیا۔
سی سی پی او لاہور محمد عمر شیخ نے کہا کہ کسی بھی پولیس اہلکار کو شہریوں کی عزت نفس مجروح کرنے کا کوئی حق نہیں، لاہور پولیس کے رویوں میں واضح تبدیلی نظر آئے گی، پولیس اب شہریوں کی عزت کرے گی۔
ان کا کہنا تھا کہ ہم شہریوں کو عزت دیں گے تو پولیس کو خودبخود عزت ملے گی، ہمارا کام شہریوں کے جان و مال کے تحفظ کو یقینی بنانا، اختیارات سے تجاوز ہرگز برداشت نہیں۔
انہوں نے واضح کیا کہ شہری کسی بھی شکایت کی صورت میں بلا جھجک سی سی پی او آفس کے شکایات سیل آ سکتے ہیں، شہری کمپلینٹس سیل نمبر 04299202881 پر رابطہ بھی کرسکتے ہیں۔
انہوں نے پولیس کو ہدایت کی کہ شہریوں کی شکایت کا فوری ازالہ کیا جائے۔
