پاکستان مسلم لیگ (ن) کے صدر اور قومی اسمبلی میں قائد حزب اختلاف شہباز شریف نے کہا ہے کہ وزیراعظم عمران خان مجھے گرفتار کرنا چاہتے ہیں۔
ذرائع کے مطابق شہباز شریف کی زیرصدارت مسلم لیگ ن کی سینئر قیادت کا اجلاس ہوا جس میں خواجہ آصف، احسن اقبال، ایاز صادق، مریم اورنگزیب، رانا تنویر اورخواجہ سعد رفیق شریک ہوئے۔
اجلاس میں شہباز شریف کی ممکنہ گرفتاری اور اس کے بعد کی صورتحال پر تبادلہ خیال کیا گیا۔
اس موقع پر مسلم لیگ ن کے رہنما و سابق اسپیکر قومی اسمبلی ایاز صادق نے کہا کہ شہباز شریف کیخلاف سیاسی انتقامی کارروائی کی جا رہی ہے، نیب صرف مسلم لیگ ن کو نشانہ بنا رہا ہے۔
یاد رہے کہ چند روز قبل اپنے بیان میں وزیر اطلاعات پنجاب فیاض الحسن چوہان نے کہا تھا کہ پاکستان مسلم لیگ نواز کے صدر شہباز شریف کو جعلی اکاؤنٹس، ٹی ٹیز اور کرپشن کیسز میں اپنی گرفتاری نظر آ رہی ہے۔
گزشتہ دنوں شہبازشریف نے بھی ایک پریس کانفرنس میں الزام عائد کیا تھا کہ عمران خان چاہتے ہیں میں گرفتار ہوجاؤں ‘ جیلیں اور صعوبتیں ہمارے لیے نئی بات نہیں ہیں۔
انہوں نے کہا تھا کہ اتنا ظلم کرو جتنا کل سہہ سکو، وقت بدلتے ہوئے دیر نہیں لگتی۔
