گوگل اس وقت دنیا کا سب سے زیادہ مقبول سرچ انجن ہے، اسے شروع ہوئے آج 22 سال مکمل ہو گئے ہیں، گوگل نے اپنی سالگرہ پر ڈوڈل بھی جاری کیا ہے۔
گوگل کا آغاز 7 ستمبر 1998 کو اسٹین فورڈ یونیورسٹی کے 2 طالب علموں نے کیا تھا اور آج یہ دنیا میں سب سے زیادہ استعمال ہونے والا سرچ انجن ہے۔
تاہم تمام دنیا کے لیے علم اور معلومات کے خزانے کھول دینے والا گوگل خود اپنی سالگرہ کی حتمی تاریخ سے آگاہ نہیں ہے۔
2006 سے گوگل اپنی سالگرہ 27 ستمبر کو منانا شروع کی، اس سے قبل 26 ستمبر کو یہ سالگرہ منائی جاتی تھی، 2004 میں اپنی چھٹی سالگرہ گوگل نے 7 ستمبر کو منائی تھی جبکہ اس سے پہلے یہ سالگرہ 8 ستمبر کو منائی جاتی تھی۔
2013 میں گوگل نے خود تسلیم کیا کہ اس نے مختلف تاریخوں پر اپنی سالگرہ منائی ہے لیکن گزشتہ کئی برسوں سے 27 ستمبر کو حتمی تاریخ بنا لیا گیا ہے۔
جب گوگل انٹرنیٹ کے میدان میں آیا تھا تو اسے یاہو سمیت دیگر طاقتور حریفوں سے مقابلہ درپیش ہوا تاہم اس نے سرچ کی اسپیڈ اور درست معلومات مہیا کر کے تمام حریفوں کو پچھاڑ دیا اور عوام میں مقبولیت حاصل کر لی۔
گوگل دنيا کی 150 سے زائد زبانوں ميں اپنی خدمات فراہم کر رہا ہے، ايک ارب سے زائد صارفین اس سے فائدہ اٹھا رہے ہيں۔ دنیا بھر میں موجود اس کے دفاتر میں قریباً 50 ہزارسے زائد ملازمین کام کرتے ہیں۔
