مسلم لیگ ن کے رہنما طلال چوہدری پر حملے کے معاملے میں مبینہ طور پر خاتون ایم این اے عائشہ رجب علی کا نام لیا جا رہا ہے اور اس حوالے سے سوشل میڈیا پر چہ میگوئیاں جاری ہیں۔
ٹویٹر پر یہ واقعہ ٹاپ ٹرینڈ کر رہا ہے جبکہ وزیراعظم کے معاون خصوصی شہباز گل نے ایک بیان داغ دیا ہے جس میں انہوں نے کہا ہے کہ حکومت خاتون ایم این اے کی حفاظت کرے گی۔
طلال چوہدری اس وقت لاہور کے اسپتال میں زیرعلاج ہیں جبکہ عائشہ رجب علی اسلام آباد پہنچ گئی ہیں۔
انہوں نے ٹویٹ میں کہا ہے کہ جس طریقے سے سوشل میڈیا اور الیکٹرانک میڈیا پر میری ذات سے متعلق بات ہوئی، وہ صرف میری نہیں بلکہ تمام خواتین کی تذلیل ہے۔
انہوں نے مزید کہا کہ میں بھی ایک ماں ہوں، بہن ہوں، کسی کی بیٹی ہوں اور ایک عزت دار گھرانے سے تعلق رکھتی ہوں۔
اپنی ٹویٹ میں ان کا کہنا تھا کہ میرا کسی معاملے سے کوئی تعلق نہیں، سنی سنائی باتوں پر یقین کر کے میری عزت پر سوال نہ اٹھایا جائے۔
اس سے قبل طلال چوہدری بھی اس معاملے پر وضاحت پیش کر چکے ہیں، ان کا کہنا تھا کہ اس معاملے سے کسی خاتون کا کوئی تعلق نہیں ہے۔
واضح رہے کہ اس واقعہ کی تحقیقات کے لیے انکوائری کمیٹی بھی تشکیل دی جا چکی ہے جس نے اپنا کام شروع کر دیا ہے۔
