ڈونلڈ ٹرمپ اور ان کی اہلیہ ملینیا ٹرمپ کورونا کا شکار ہو گئے
امریکی صدر ڈونلڈ ٹرمپ اور ان کی اہلیہ ملینیا ٹرمپ میں کورونا وائرس کی تصدیق ہو ئی ہے۔
سماجی رابطوں کی ویب سائٹ ٹوئٹر پر امریکی صدر نے اس بات کی تصدیق کرتے ہوئے بتایا کہ دونوں میاں بیوی قرنطینہ میں جا رہے ہیں۔
ان کا کہنا تھا کہ ہم نے اپنی صحت کی بحالی کا عمل فوری شروع کردیا ہے اور ہم ایک ساتھ اس مرحلے سے کامیابی سے گزریں گے
اس سے پہلی ٹویٹ میں ڈونلڈ ٹرمپ نے بتایا کہ میرے مشیر ہوپ ہکس کا کورونا ٹیسٹ مثبت آیا ہے جس کے بعد میں اور میری اہلیہ میلینیا ٹرمپ قرنطینہ میں جا رہے ہیں۔
انہوں نے بتایا تھا ہم اپنے کورونا کے نتائج کا انتظار کر رہے ہیں اور اس دوران ہم نے قرنطینہ میں جانے کا عمل شروع کر دیا ہے۔
ملینیا ٹرمپ نے بھی کورونا میں مبتلا ہونے کی تصدیق کرتے ہوئے کہا ہے کہ وہ اور ان کے شوہر کورونا وائرس کا ٹیسٹ مثبت آنے کے بعد گھر میں ہی قرنطینہ میں رہیں گے جیسے اس سال کئی امریکی رہ چکے ہیں۔
ان کا کہنا تھا کہ ہم نے اپنی تمام مصروفیات کو ترک کردیا ہے۔
امریکی صدر کے ڈاکٹر شان کونلی نے صحافیوں کو ایک خط جاری کیا جس میں انہوں نے بتایا کہ ڈونلڈ ٹرمپ کا ٹیسٹ مثبت آیا ہے۔
انہوں نے کہا کہ صدر اور خاتون اول دونوں اس وقت اچھے ہیں اور وائٹ ہاؤس میں قرنطینہ میں جا رہے ہیں۔
انہوں نے مزید بتایا کہ وائٹ ہاؤس کی میڈیکل ٹیم اور میں نگرانی کروں گا اور میں ملک کے بہترین پیشہ ورانہ اداروں اور اداروں کی جانب سے فراہم کی جانے والی مدد پر ان کو سراہتا ہوں۔
انہوں نے خط میں کہا کہ وہ اس حوالے سے تمام تر معلومات فراہم کرنے کا سلسلہ جاری رکھیں گے۔
یاد رہے کہ صدر ٹرمپ کے انتخابات میں کامیابی کی راہ میں سب سے بڑا چیلنج کورونا وبا کا ہے جسے روکنے میں وہ ناکام ہو گئے تھے۔
انہوں نے حالیہ دنوں میں امریکی عوام کو یہ بتانا شروع کیا تھا کہ یہ وبا اب گزر چکی ہے لیکن ان کے خود اس کا شکار ہونے کے بعد یہ دعویٰ کمزور پڑ گیا ہے۔
کورونا وائرس اب تک 2 لاکھ سے زائد امریکیوں کو ہلاک کر چکا ہے جبکہ مصدقہ کیسز کی تعداد 73 لاکھ سے بڑھ چکی ہے۔
