اسلام آباد: قومی احتساب بیورو (نیب) نے نوازشریف کی جائیدادوں کے متعلق رپورٹ احتساب عدالت میں جمع کرا دی ہے جس میں ان کے تمام اثاثوں کی تفصیل بتائی گئی ہے۔
نیب رپورٹ میں بتایا گیا ہے کہ نواز شریف محمد بخش ٹیکسٹائل ملز میں 4 لاکھ 67 ہزار 950 شیئرز، حدیبیہ پیپلز ملز میں 3 لاکھ 43 ہزار 425، حدیبیہ انجینئرنگ کمپنی میں 22 ہزار 213 اور اتفاق ٹیکسٹائل ملز میں 48 ہزار 606 شیئرز کے مالک ہیں۔
اسی طرح ان کے مختلف بینکوں میں 5 مقامی اور 3 غیرملکی اکاؤنٹس ہیں جن میں مجموعی طور پر 6 لاکھ 12 ہزار روپے، 556 یورو، 698 امریکی ڈالرز اور 498 برطانوی پاؤنڈز جمع ہیں۔
اسی طرح سابق وزیراعظم اور ان کے زیرکفالت افراد 1752 کنال اراضی کے مالک ہیں، ان جائیدادوں میں لاہور کے موضع مانک میں 936 کنال، موضع بڈوکسانی 299 کنال، موضع مال رائے ونڈ 103 کنال، موضع سلطان 312 کنال، شیخو پورہ کے موضع منڈیالی میں 14 کنال اور موضع فیروزوطن میں 88 کنال اراضی شامل ہے۔
نواز شریف اور ان کے زیر کفالت افراد کے نام مری میں بنگلہ، چھانگلہ گلی ایبٹ آباد میں 15 کنال کا مکان اور اپر مال لاہور پر جائیداد موجود ہے۔
اسی طرح ایک لینڈ کروزر، 2 مرسڈیز گاڑیوں اور 2 ٹریکٹرز بھی نوازشریف کے نام پر رجسٹرڈ ہیں۔
یہ رپورٹ نیب کے تفتیشی افسر محمد راحیل اعظم نے احتساب عدالت میں جمع کرائی ہے۔ اس کی تفصیلات حاصل کرنے کے لیے نیب نے ایس ای سی پی، ایل ڈی اے، لاہور اور شیخو پورہ کے ایڈیشنل ڈپٹی کمشنرز، مری کے اسسٹنٹ کمشنر اورگلیات ڈویلپمنٹ اتھارٹی سے رابطہ کیا تھا۔
