ڈاکٹرز نے کورونا وائرس میں مبتلا امریکی صدر ڈونلڈ ٹرمپ کی صحت کے لیے اگلے 48 گھنٹے اہم قرار دے دیئے ہیں۔
امریکی میڈیا کے مطابق ڈونلڈ ٹرمپ کی طبیعت تاحال سنبھل نہیں سکی ہے اور وہ مزید کئی دنوں تک اسپتال میں زیرعلاج رہیں گے۔
دوسری جانب وائٹ ہاوَس انتظامیہ کی جانب سےصدر ٹرمپ کی صحت پر تشویش کا اظہار کیا گیا ہے۔
وائٹ ہاؤس کے ڈاکٹرز کا کہنا ہے کہ ہم امریکی صدر کی صحت بارے محتاط طور پر پرامید ہیں۔
خیال رہے کہ جمعہ کے روز امریکی صدر اور ان کی اہلیہ میں کورونا وائرس کی تشخیص ہوئی تھی جس کے بعد انہوں نے خود کو قرنطینہ کر لیا تھا۔
اپنی ٹوئٹ میں انہوں نے لکھا کہ میرا اورخاتون اول میلینا کا بھی کورونا ٹیسٹ مثبت آیا اور ہم نے خود کو قرنطینہ کر لیا ہے۔ ہم اس وبا سے مل کر نمٹیں گے۔
دوسری جانب طبی ماہرین نے ڈونلڈ ٹرمپ کی عمر اور ان کے وزن کو خطرناک قرار دیتے ہوئے کہا ہے کہ ایسے افراد کا وبا سے متاثر ہونے کا خطرہ زیادہ ہوتا ہے۔
خیال رہے کہ ڈونلڈ ٹرمپ متعدد بار کورونا ایس او پیز کو نظر انداز کرتے دکھائی دیئے ہیں۔
انہوں نے چند روز قبل انتخابی مباحثے میں بھی بغیر ماسک پہنے شرکت کی تھی۔
ماسک پہننے کی پابندی کی مخالفت کرتے ہوئے صدر ٹرمپ کا کہنا تھا کہ وہ یہ پابندی نہیں لگائیں گے کہ ماسک لازمی پہنا جائے۔
دو روز قبل بھی صدارتی امیدوار جو بائیڈن کے ساتھ پہلے مباحثے میں شریک صدر ٹرمپ نے ماسک پہننے پر جو بائیڈن کو تنقید کا نشانہ بنایا تھا۔
