امیر جماعت اسلامی سراج الحق نے کہا ہے کہ ایک دوسرے کو چور ڈاکو کہنے والے رات کے اندھیرے میں ایک ہو گئے ہیں۔
اپنے بیان میں ان کا کہنا تھا کہ پاکستان میں جو نظام مسلط ہے وہ اشرافیہ پر مشتمل ہے ، پوری قوم مایوسی سے دوچار ہے، نوجوان ڈگریاں پھاڑ رہے ہیں۔
سراج الحق نے کہا کہ عام پاکستانی کی جیب میں بجلی کے بل اور بچوں کی اسکول فیس ادا کرنے کا پیسہ نہیں، پاکستانیوں کے ہاتھ میں آئی ایم ایف اور ورلڈ بینک کی ہتھکڑیاں ہیں۔
جن لوگوں نے ملک کو لوٹا، ان کی تحریک کا حصہ نہیں بن سکتے، سراج الحق
ان کا کہنا تھا کہ ن لیگ، پیپلزپارٹی کا ٹولہ ہی تحریک انصاف ہے، اگر بلا امتیاز احتساب ہو گیا تو کوئی بھی نہیں بچے گا۔
انہوں نے کہا کہ کرپٹ سرمایہ دار اور حکمران پاکستان کی بربادی کے ذمہ دار ہیں، بھارت کے مقابلے میں سیاسی ٹھگوں سے زیادہ خطرہ ہے۔
یاد رہے کہ جماعت اسلامی نے حزب اختلاف کی کل جماعتی کانفرنس میں شمولیت سے انکار کیا تھا۔
امیر جماعت سراج الحق نے اس موقع پر کہا تھا کہ ان کی جماعت ملک لوٹنے والوں کی تحریک کا حصہ نہیں بن سکتی۔
ایک ہفتے قبل شہر قائد میں جماعت اسلامی کے زیر اہتمام منعقدہ ’حقوق کراچی مارچ‘ سے خطاب کرتے ہوئے ان کا کہنا تھا کہ کراچی کو آج تک کسی حکومت نے حق نہیں دیا۔
انہوں نے کہا کہ کراچی منی پاکستان ہے۔ ان کا کہنا تھا کہ کراچی خوشحال ہوتا ہے تو پاکستان خوشحال ہوتا ہے۔
امیر جماعت اسلامی پاکستان سینیٹر سراج الحق نے اپنے خطاب میں واضح کیا کہ کراچی کی تباہی پاکستان کی تباہی ہے۔
