حکومت عوام کے بجائے مافیا کی جیب بھر رہی ہے، مریم اورنگزیب

مسلم لیگ ن کی ترجمان مریم اورنگزیب نے کہا ہے کہ وزیراعظم کی ترجیح مافیاز کو ریلیف دینا ہے نہ کہ عوام کو، حکومت عوام کی بجائے مافیا کی جیبیں بھر رہی ہے۔

اپنے بیان میں انہوں نے کہا کہ صبح صبح ایک بیانیہ آ جاتا ہے جس کا جواب دینا پڑتا ہے، جھوٹے احتساب کا بیانیہ دفن ہو گیا ہے۔

ان کا کہنا تھا کہ عوام حکومتی نااہلی اور  نالائقی کی سزا بھگت رہے ہیں، کابینہ اجلاس صرف یہ فیصلہ کرنے کے لیے ہوتا ہے کہ کس کے خلاف مقدمہ بنانا ہے۔

مریم اورنگزیب نے کہا کہ گزشتہ انتخابات میں آر ٹی ایس سسٹم بٹھا کر نااہل ٹولہ مسلط کیا گیا، عوام کے سامنے ان کی چوری اور کرپشن عیاں ہو چکی ہے۔

انہوں نے کہا کہ نوازشریف کےخلاف کرپشن نہ ملی تو غداری کا بیانیہ  لے آئے ہیں۔

ان کا کہنا تھا کہ حکومت نے چینی، آٹے اور ادویات مافیا کےسامنے گھٹنے ٹیک دیئے، یوٹیلیٹی اسٹورز کا آٹا جانوروں کو ڈالنے کے قابل ہے۔

مریم اورنگزیب نے کہا کہ ایک سال کے دوران سبزی کی قیمتوں میں 45 فیصد اضافہ ہوا، ٹماٹر 97، آلو 74، چاول 20 اور مصالحوں کی قیمتوں میں 78 فیصد اضافہ ہوا ہے۔

انہوں نے مزید بتایا کہ لوبیہ 42، مونگ دال کی قیمت میں 45 فیصد اضافہ ہوا، کوئی شعبہ ایسا نہیں جس میں کرپشن  اور نااہلی نہ ہو۔

ان کا کہنا تھا کہ 20 کلو آٹا 1100 روپے میں بیچا جا رہا ہے، مقامی سطح پر نکلنے والی گیس کی قیمت باہر سے خریدی گئی ایل این جی سے زیادہ ہے۔