وزیراعظم عمران خان نے خدشے کا اظہار کرتے ہوئے کہا ہے کہ سردیوں میں کورونا کی دوسری لہر آسکتی ہے۔
سماجی رابطوں کی ویب سائٹ ٹوئٹر سے جاری اپنے پیغام میں انہوں نے اپیل کرتے ہوئے کہا کہ عوامی مقامات پر ہر کوئی ماسک پہنے۔
انہوں نے لکھا کہ تمام دفاتر اور تعلیمی اداروں میں ماسک کا استعمال یقینی بنایا جائے۔
خیال رہے کہ پاکستان سمیت دنیا بھر کے بیشتر ممالک میں کورونا وائرس کے کیسز میں ایک مرتبہ پھر اضافہ ہونا شروع ہو گیا ہے۔
پاکستان میں گزشتہ 24 گھنٹوں کے دوران عالمی وبا سے مزید چھ افراد جاں بحق جب کہ 632 متاثر ہوئے ہیں۔
نیشنل کمانڈ اینڈ آپریشن سینٹر کی جانب سے جاری کردہ تازہ ترین اعدادوشمار کے مطابق پاکستان میں کورونا سے ہونے والی اموات کی تعداد چھ ہزار 513 ہو گئی ہے جب کہ عالمی وبا سے 3 لاکھ 14 ہزار 616 افراد متاثر ہوئے ہیں۔
ملک بھر میں کورونا کے فعال کیسز کی تعداد 9 ہزار 135 ہے جب کہ گزشتہ 24 گھنٹوں کے دوران 375 کورونا مریض صحت یاب ہوئے ہیں۔
کورونا وائرس کے باعث پنجاب میں 2 ہزار 240 اور سندھ میں 2 ہزار 520 اموات ہو چکی ہیں جبکہ خیبر پختونخوا میں اموات کی تعداد ایک ہزار 260، اسلام آباد میں 183، بلوچستان میں 146، گلگت بلتستان میں 88 اور آزاد کشمیر میں 76 ہو گئی ہے۔
یورپ کے کئی ممالک کورونا کی دوسری لہر کا شکار ہو چکے ہیں، فرانس میں ہزاروں کی تعداد میں روزانہ لوگ وائرس میں مبتلا ہو رہے ہیں۔
عالمی ادارہ صحت متعدد بار کورونا کی نئی لہر کے متعلق خبردار کر چکا ہے، کئی سائنسدانوں کا کہنا ہے کہ دنیا کو کورونا کے ساتھ رہنا سیکھنا پڑے گا۔
