جنیوا: عالمی ادارہ صحت نے بتایا ہے کہ اندازاً دنیا کی 10 فیصد آبادی کورونا میں مبتلا ہو چکی ہے۔ اس وقت کرہ ارض پر 7 ارب 80 کروڑ افراد بستے ہیں جن کا 10 فیصد 78 کروڑ بنتا ہے۔
دنیا بھر میں کورونا کے مصدقہ کیسز کی تعداد ساڑھے 3 کروڑ ہو چکی ہے جبکہ 10 لاکھ سے زائد افراد وائرس کے ہاتھوں ہلاک ہو چکے ہیں۔ تاہم عالمی ادارہ صحت کے مطابق حقیقی تعداد اس کے 20 گنا سے بھی زیادہ ہے۔
یہ اعدادوشمار ڈبلیو ایچ او کے ایمرجنسیز ڈائرکٹر مائیکل ریان نے ایگزیکٹو بورڈ کے خصوصی اجلاس میں بتائے، ان کا کہنا تھا کہ انفیکشن مختلف سطحوں پر پھیل رہا ہے، یہ شہروں میں تباہی پھیلا کر دیہی علاقوں کی طرف رخ کر چکا ہے اور مختلف قسم کے گروہوں میں پھیل رہا ہے۔
انہوں نے خبردار کیا کہ اس کا مطلب ہے دنیا کی آبادی کی اکثریت ابھی تک خطرے کی زد میں ہے۔
ڈبلیو ایچ او کے ڈائرکٹر جنرل ٹیدروس ایڈہانوم نے اجلاس کے شرکاء کو بتایا کہ یہ وبا ہمیں خواب غفلت سے جگا رہی ہے، ہمیں آئینے کے سامنے کھڑے ہو کر خود سے سوال کرنا چاہیے کہ ہم اس سے بہتر کیا کچھ کر سکتے ہیں؟
ٹیڈروس نے کہا کہ ہم نے مختلف ممالک کی نئے خیالات سامنے لانے میں حوصلہ افزائی کی ہے۔
عالمی ادارہ صحت کے ایگزیکٹو بورڈ میں 34 مختلف ممالک کے نمائندوں پر مشتمل ہے جنہیں 3 سال کے دورانیے کے لیے منتخب کیا جاتا ہے۔
