پمز میں کورونا بے قابو، ڈاکٹرز کا آئسولیشن وارڈ میں ڈیوٹی سے انکار

وفاقی دارالحکومت اسلام آباد کے معروف اسپتال پاکستان انسٹیٹوٹ آف میڈیکل سائنسز (پمز) کے ڈاکٹرز سمیت 30 سے زائد افراد میں کورونا وائرس کی تشخیص ہوئی ہے۔

ذرائع کے مطابق پمز اسپتال کے کورونا ائیسولیشن وارڈ میں ڈاکٹرز نے ڈیوٹی کرنے سے انکار کر دیا ہے۔

ذرائع کا کہنا ہے کہ اسپتال میں موجود کوئی بھی ڈاکٹر ڈیوٹی سرانجام دینے کے لیے تیار نہیں ہے۔

دوسری جانب پمز اسپتال کے کورونا وارڈ میں مریضوں کے سیمپل لینے کے لیے بھی عملہ غیر حاضر ہے۔

 مزید برآں ترجمان پمز نے بتایا ہے کہ اسپتال میں داخل کورونا کا ایک مریض جاں بحق ہو گیا ہے جسے 3 روز قبل پمز لایا گیا تھا۔

انہوں نے بتایا کہ 65 سالہ مریض کا تعلق راولپنڈی سے ہے جب کہ پمز میں اب تک کورونا سے متاثرہ 16 مریض زیر علاج ہیں۔

اسلام آباد کے تعلیمی اداروں میں بھی متعدد کورونا کیسز سامنے آئے ہیں جس کے بعد انہیں بند کر دیا گیا ہے۔

پاکستان میں اب تک کورونا وائرس کے مجموعی کیسز کی تعداد 3 لاکھ 15 ہزار 727 ہے جن میں سے 3 لاکھ 616 صحتیاب ہو چکے ہیں، انتقال کر جانے والوں کی تعداد 6 ہزار 523 ہے۔

ستمبر کے اواخر سے پاکستان میں کورونا وائرس کے یومیہ کیسز میں اضافہ دیکھنے میں آیا ہے، وزیراعظم عمران خان بھی کورونا کی دوسری لہر کے متعلق خدشات کا اظہار کر چکے ہیں۔

اسی طرح عالمی ادارہ صحت بھی سردیوں میں وبا کے دوسرے حملے کے متعلق خبردار کر چکا ہے۔