مسلم لیگ (ن) کی نائب صدر مریم نواز نے کہا ہے کہ پاکستان کی ہر بیماری کا علاج ووٹ کو عزت دینے میں ہے۔
لاہور میں پارٹی اجلاس سے خطاب کرتے ہوئے انہوں نے کہا کہ ہم فیصلہ کن جدوجہد میں داخل ہونے جا رہے ہیں، ووٹ کی عزت اور حرمت پامال ہوئی ہے، اس کے گواہ پارٹی کے ٹکٹ ہولڈرز ہیں۔
نوازشریف پر غداری کا مقدمہ درج کرنے کے متعلق انہوں نے کہا کہ یہ کیسا غدار ہے جس نے بھارتی ایٹمی دھماکوں کے جواب میں ایٹمی دھماکے کیے اور پاکستان کے دفاع کو مضبوط کیا۔
نواز شریف کے اشتہاری ہونے کے متعلق مریم نواز کا کہنا تھا کہ حکومت کو ڈھول بجانے کا شوق ہے تو بڑے شوق سے بجائے، تم ڈھول بجا کر اعلانات کراؤ گے تو ڈھول سے ارشد ملک، شوکت عزیز صدیقی اور بشیر میمن کی گواہی آئے گی۔
ان کا کہنا تھا کہ نواز شریف نے کارکنان کو تنہا نہیں چھوڑا، انہوں نے سارے وار پہلے اپنے سینے پر سہے پھر کارکنان کو آواز دی۔
مریم نواز نے بتایا کہ انہیں والد نے کہا بیگ تیار رکھو، گرفتاری ہو تو سینہ تان کر جانا گھبرانا نہیں، آئین و قانون اور جمہوریت کا سر نہیں جھکنے دیں گے۔
انہوں نے مزید کہا کہ جب قربانی دینے کا وقت آئے گا تو مریم نواز صف اول میں ہوگی۔
