کوئٹہ کی سریاب روڈ پر گزشتہ روز موٹر سائیکل کی ٹکر سے ایک بھکاری شدید زخمی ہو گیا جسے میڈیکل ایمرجنسی ریسپونس سینٹر کے اہلکاروں نے بروقت طبی امداد فراہم کی اور پھر اسے سول ہسپتال لے کر گئے۔
اسپتال جا کر یہ انکشاف ہوا کہ بھکاری نے اپنے کپڑوں میں 85 ہزار روپے چھپائے ہوئے تھے، میڈیکل پولیس ٹیم نے اس رقم کو اپنے قبضے میں لے لیا جبکہ مریض کو علاج کے لیے وارڈ میں داخل کر دیا گیا۔
پولیس کا کہنا ہے کہ بھکاری کی جیب سے برآمد ہونے والی رقم نوٹوں اور سکوں کی شکل میں ہے۔
ایک اور واقعے میں خیبرپختونخواحکومت نے لکھ پتی بھکاری کو سرکاری تحویل میں لے لیا ہے۔
صوبہ خیبرپختونخوا میں پیشہ ور بھکاریوں کے خلاف کریک ڈاؤن کا آغاز کیا گیا تو محکمہ سوشل ویلفیئر نے ایک ایسے بھکاری کو تحویل میں لیا جس کے پاس سے ایک لاکھ 9 ہزار روپے برآمد ہوئے ہیں۔
صوبائی محکمہ سوشل ویلفیئر کے ذمہ داران کے مطابق پیشہ ور بھکاری نے یہ رقم اپنی چپل میں چھپائی ہوئی تھی۔
