وزیراعظم کی زلفی بخاری، علی زیدی کو قواعد کے خلاف لگژری سرکاری گاڑیاں استعمال کرنے کی اجازت

اسلام آباد: وزیراعظم عمران خان نے غیر معمولی فیصلہ کرتے ہوئے اپنے ذاتی دوست زلفی بخاری اور علی زیدی کو قواعد کو نظرانداز کرتے ہوئے مہنگی اور لگژری سرکاری گاڑیاں استعمال کرنے کی اجازت دے دی ہے۔

ان تفصیلات کا انکشاف پارلیمنٹ میں پیش کی گئی دستاویزات میں کیا گیا ہے۔

قانون کے تحت ایک وزیر ایک وقت میں ایک سرکاری گاڑی استعمال کرسکتا ہے اور گاڑی 1800 سی سی ہونی چاہیے۔

تاہم دستاویزات میں انکشاف کیا گیا ہے کہ حیران کن طور پر 6 ایسے خوش نصیب وزیر اور مشیر ہیں جنہیں بہت مہنگی اور لگژری گاڑیاں دی گئیں۔ اس کے لیے وزیراعظم عمران خان نے رولز کو ریلیکس کر کے منظوری دی ہے۔

دیگر ساتھیوں کے علاوہ زلفی بخاری اور علی زیدی کو 4600 سی سی بڑی سرکاری گاڑی دی گئی ہے۔

دیگر 40 وزیر 1800 سی سی گاڑیاں استمعال کر رہے ہیں لیکن زلفی بخاری کے معاملے میں وزیراعظم نے اپنے خصوصی اختیارات استعمال کرتے ہوئے مہنگی اور لگژری گاڑی دی ہے۔

سرکاری دستاویزات میں یہ نہیں بتایا گیا کہ زلفی بخاری کو ہی کیوں یہ فیور کی گئی ہے اور باقی چالیس پچاس وزیروں اور مشیروں اور معاونین خصوصی کے لیے مہنگی گاڑیوں کی وزیراعظم نے منظوری کیوں نہیں دی۔

یاد رہے کہ زلفی بخاری وزیراعظم عمران خان کے بہت قریبی سمجھے جاتے ہیں۔