نواب شاہ: پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمان نے کہا ہے کہ اداروں کو ملکی معاملات میں مداخلت نہیں کرنی چاہیے۔
نواب شاہ میں میڈیا سے بات کرتے ہوئے مولانا فضل الرحمان نے کہا کہ عوام کا ووٹ چوری کیا گیا ہے، اداروں کی حکومتی معاملات میں مداخلت نہیں ہونی چاہیے۔
انہوں نے کہا کہ ملکی صورتحال سب کے سامنے ہے اور ہم گزشتہ دو سال سے دیکھ رہے ہیں کہ سب لوگ پریشان ہیں۔
ان کا کہنا تھا کہ ایک سال قبل ملین مارچ اور آزادی مارچ ہوا تھا تاہم اب پی ڈی ایم کے پلیٹ فارم پر تمام جماعتیں ساتھ ہیں۔
مولانا فضل الرحمان نے کہا کہ ہم ملکی اداروں کا احترام کرتے ہیں، اس وقت ملک میں آئینی حکمرانی کی جدوجہد ہو رہی ہے۔ عوام پر مسلط کی جانے والی حکمرانی کا تصور اب ختم ہونا چاہیے۔
انہوں نے کہا کہ ہر ادارے کو اپنے دائرے میں رہ کر کام کرنا چاہیے، سندھ جزائر پر حق سندھی عوام کا ہے وفاق کا نہیں۔
کراچی صورتحال پر بات کرتے ہوئے سربراہ پی ڈی ایم نے کہا کہ آئی جی سندھ سے متعلق انکوائری کی ضرورت نہیں بلکہ ان افراد کے خلاف کارروائی ہونی چاہیے جنہوں نے کیپٹن (ر) صفدر کے خلاف زبردستی مقدمہ درج کرایا۔
