سیمی اگروال نے اگرچہ ایک طویل عرصہ سے کسی بھی فلم میں کام نہیں کیا لیکن ان کے ٹاک شو نے سیمی کے کیرئیر کو ایک نئی زندگی بخشی ہے۔
ان کے ٹاک شو کی 150 اقساط ہو چکی ہیں، اس کی بڑی خوبی یہ ہے کہ میزبان سیمی اگروال مشہورومعروف شخصیات کو اپنے دل کا احوال زبان پر لانے پر مجبور کر دیتی ہیں۔
73 سالہ سیمی اگروال نے اپنے چند یادگار انٹرویوز کا ذکر کیا ہے جن میں اپنے آپ کو سینت سینت کر رکھنے والے سیاستدانوں سے لے کر اداکاروں تک نے غیرمتوقع طور پر خود کو عیاں کر دیا تھا۔ اس میں سب سے اہم انٹرویو ریکھا تھا جس نے دھوم مچا دی تھی۔
ریکھا اور امیتابھ بچن
بالی ووڈ کی لیجنڈ اداکارہ ریکھا کے متعلق سب کہتے ہیں کہ وہ امیتابھ بچن کی محبت میں مبتلا ہیں مگر پہلی بار ان کی زبان سے اعتراف کرانے کا سہرا سیمی اگروال کے سر ہے۔۔
ان کا کہنا ہے کہ بہت سے لوگ مجھ سے یہ سوال کرتے ہیں کہ میں نے کس طرح ریکھا کو یہ اعتراف کرنے پر مجبور کیا، سیمی کے مطابق ہم نے بس اچھے دوستوں کی طرح گپ شپ کی تھی، ہمارا تعلق بہت طویل عرصے پر محیط ہے۔
اس انٹرویو میں ریکھا نے امیتابھ بچن کے متعلق بتایا کہ اس آدمی میں کچھ ایسا تھا جو میں نے کبھی نہیں دیکھا، میں ان جیسے شخص سے کبھی نہیں ملی تھی۔
ریکھا نے بتایا کہ میں امیتابھ کے متعلق سوچتی ہوں تو خیال آتا ہے کہ قدرت ایک شخص کو اتنی زیادہ اچھی خصوصیات کیسے بخش سکتی ہے؟ میں بیوقوف نہیں ہوں بلکہ خود کو ایک ذہین عورت سمجھتی ہوں اور جب کوئی اچھی بات دیکھتی ہوں تو اسے پہچان لیتی ہوں۔
سیمی اگروال نے ان سے امیتابھ بچن کی محبت میں مبتلا ہونے کا سوال کیا تو ریکھا نے بے ساختہ جواب دیا کہ یقیناً! یہ تم نے کیسا بیوقوفانہ سوال کیا ہے۔
انہوں نے کہا کہ میں نے آج تک ایسے کسی مرد، عورت یا بچے کو نہیں دیکھا جو مکمل طور پر، جذباتی انداز میں، پاگل پن سے اور بے بس و بے اختیار ہو کر امیتابھ کی محبت میں پوری طرح نہ ڈوب گیا ہو، تو میں اس سے کیسے بچ سکتی تھی؟
ریکھا نے مزید زور دے کر کہا کہ میں اس بات سے کیوں انکار کروں؟ کیا مجھے اس سے محبت نہیں ہے؟ ایسا کیسے ہو سکتا ہے، مجھے بلا شک و شبہ اس سے محبت ہے۔
