لاہور: مسلم لیگ ن کی نائب صدر مریم نواز نے کہا ہے کہ این آر او کی ضرورت خود عمران خان کو ہے۔
پی ڈی ایم جلسے میں شرکت کے لیے کوئٹہ روانگی سے قبل اپنی رہائش گاہ جاتی امرا میں میڈیا سے گفتگو کرتے ہوئے مریم نواز کا کہنا تھا کہ پاکستان ڈیموکریٹک موومنٹ (پی ڈی ایم) کا کل کوئٹہ میں ہونے والا جلسہ کامیاب ہو گا جس میں نوازشریف بھی خطاب کریں گے۔
ان کا کہنا تھا کہ عمران خان کے کل کے انٹرویو سے معلوم ہوتا ہے کہ پی ڈی ایم کی تحریک کا بڑا اثر پڑا ہے۔
اپوزیشن عدلیہ اور فوج پر دباؤ ڈال کر این آر او چاہتی ہے، عمران خان
عمران خان مہرہ ہے، بڑوں کی لڑائی میں بچوں کا کوئی کام نہیں، مریم نواز
نون لیگ کی نائب صدر نے کہا کہ یہ معاملات زیادہ دیر چلتے نظر نہیں آتے۔
کراچی میں اپنے شوہر کیپٹن صفدر کی گرفتاری کے واقعہ کے متعلق انہوں نے کہا کہ اس سے حکومت کی بدنامی ہوئی ہے۔
انہوں نے مزید کہا کہ اگرچہ سندھ حکومت کو اس کی تحقیقات کا حق ہے لیکن یہ معاملہ روزروشن کی طرح عیاں ہے، اس کی تحقیقات کی ضرورت نہیں ہے۔
وزیراعظم عمران خان کے نوازشریف کو برطانیہ سے واپس لانے کے دعویٰ کے متعلق ان کا کہنا تھا کہ انہیں معلوم ہونا چاہیئے برطانیہ قانون کے تحت چلتا ہے، وہاں ارشد ملک جیسے ججز نہیں ہوتے۔
مریم نواز نے کہا کہ ماضی میں یہ الطاف حسین کو بھی لانے گئے تھے، ان کی بھڑکیاں آپ سنا کریں، برطانیہ اس طرح کی بھڑکیوں کو کچھ نہیں سمجھتا۔
مریم نواز نے کہا کہ عمران خان اپنا قد اونچا کرنے کے لیے نواز شریف کا نام لیتے رہتے ہیں۔
حکومت پر تنقید کرتے ہوئے انہوں نے کہا کہ چینی اور آٹا مارکیٹ سے غائب ہے لیکن حکومت کی توجہ نواز شریف پر ہے۔ ملک میں لوگ آٹا اور چینی کو ترس گئے ہیں۔
پی ڈی ایم کا کوئٹہ کا جلسہ کل ہونا ہے، بلوچستان حکومت نے اپوزیشن رہنماؤں سے اپیل کی ہے کہ وہ دہشت گردی کے خطرے کے پیش نظر اسے ملتوی کر دیں۔
