نیوانڈیا ڈاکٹرائن، بھارت کی چین اور پاکستان کو دھمکی

بھارت کے قومی سلامتی کے مشیر اجیت دوول نے اپنے بیانیے کو نیو انڈیا ڈاکٹرائن کا نام دیتے ہوئے کہا ہے کہ جنگ ان ممالک تک لے جائیں گے جہاں سے یہ خطرات آ رہے ہیں۔

اجیت دوول نے نئی دلی میں ایک تقریب سے خطاب کے دوران کہا کہ بھارت نے پہلے کبھی حملہ نہیں کیا بلکہ ہمیشہ اپنے دفاع میں کارروائی کی تاہم اب بھارت پہل نہ کرنے کے ماضی کے نظریے میں تبدلی لا رہا ہے اور نیو انڈیا ڈاکٹرائن کے تحت جہاں سے خطرہ ہو گا وہاں پر میدان جنگ بنا دیا جائے گا۔

دوسری جانب بھارتی نیوز ایجنسی پریس ٹرسٹ آف انڈیا کے مطابق انکشاف بھارتیہ جنتا پارٹی (بی جے پی) رہنما سواتنترا دیو سنگھ نے پارٹی کارکنان کے اجلاس میں کہا کہ رام مندر اور آرٹیکل 370 کے فیصلوں کی طرح نریندر مودی فیصلہ کرچکے ہیں کہ پاکستان اور چین کے ساتھ جنگ کب لڑی جائے گی۔

اجیت دوول کے بیان پر رد عمل دیتے ہوئے دفاعی تجزیہ کار میجر جنرل ریٹائرڈ غلام مصطفی نے کہا کہ بھارت روز اول سے پاکستان کو کمزور کرنا چاہتا ہے لیکن حقیقت یہ ہے کہ وہ اس راہ پر چل کر خود بھی کمزورہو رہا ہے۔

دفاعی تجزیہ کار میجر جنرل ریٹائرڈ غلام مصطفی نے مقبوضہ کشمیر میں 9 لاکھ بھارتی افواج کا ذکر کرتے ہوئے کہا کہ اقلیتوں کے خلاف اقدامات سے بھارت خود کو کمزور کر رہا ہے ۔

دفاعی تجزیہ کار نے بھارت کے گلگت، آزاد کشمیر اورآخر میں پاکستان پر قبضہ کرنے کے مذموم عزائم کا ذکر کرتے ہوئے کہا کہ ہمیں خطے میں پاکستان کے لئے بڑھتے ہوئے خطرات کو سمجھ کر اس کے تدارک کیلئے اقدامات اٹھانا ہوں گے کیونکہ پاکستان نے امن پسندی کے نام پراپنے ہاتھ پاؤں خود باندھ رکھے ہیں۔