ایک منٹ میں کورونا کی تشخیص کرنے والا ٹیسٹ متعارف

سنگا پور کی ایک کمپنی نے ایک منٹ میں کورونا وائرس کی تشخیص کرنے والا ٹیسٹ تیار کرنے کا دعویٰ کیا ہے۔

کمپنی کے مطابق 180 افراد پر پائلٹ کلینیکل ٹرائل میں اس ٹیسٹ نے 90 فیصد سے زیادہ درست نتائج فراہم کئے، کمپنی کو توقع ہے کہ اگلے سال کے شروع میں اس کے استعمال کی منظوری مل جائے گی۔

واضح رہے دنیا بھر میں پولیمیئر چین ری ایکشن (پی سی آر) کے متبادل ٹیسٹوں کی تیاری پر کام کیا جا رہا ہے۔

پی سی آر کی لاگت زیادہ جبکہ سپلائی کم ہے جس کی وجہ سے کچھ ممالک کو اس کی قلت کا سامنا ہے۔

سنگا پور کمپنی نے اس ٹیسٹ کی قمیت 20 ڈالر رکھی ہے، کمپنی کا کہنا ہے کہ پی سی آر ٹیسٹوں کے مقابلے میں یہ 70 فیصد سستا ہے۔

اس حوالے سے طبی ماہرین کا کہنا ہے کہ مریضوں کو تشخیص کے لئے پی سی آر ٹیسٹوں کی ضرورت پڑ سکتی ہے۔

 اس ٹیسٹ کے طریقہ کار کے حوالے سے کمپنی کا کہنا ہے کہ سانس کا یہ ٹیسٹ ایک ابتدائی لیول کی اسکریننگ ڈیوائس کے طور پر کام کرے گا، جسے کانفرنس، کھیلوں کے مقابلوں اور کنسرٹس میں استعال کا جا سکے گا۔

اس ڈیوائس میں مرکبات سانس کا تجزیہ کر کے تعین کریں گے کہ کوئی فرد کورونا کا شکار ہے یا نہیں، جس کا نتیجہ 60 سیکنڈ کے اندر ایک کمپیوٹر سے معلوم ہو گا۔

اگر اس ٹیسٹ کو ریگولیٹری منظوری ملتی ہے تو یہ دنیا میں کورونا وائرس کی تشخیص کرنے والا سب سے تیز ترین ٹیسٹ بھی ہو گا۔

واضح رہے اس سے پہلے برطانیہ کی آکسفورڈ یونیورسٹی نے کورونا وائرس کی تشخیص کا ٹیسٹ تیار کا تھا جو 5 منٹ سے بھی کم وقت میں کورونا کی تشخیص کر سکتا ہے۔