چیئرمین پیپلزپارٹی بلاول بھٹو زرداری نے جنوری میں اسلام آباد پہنچ کر حکومت کو گھر بھیجنے کا عندیہ دے دیا۔
بلاول بھٹو زرداری گزشتہ کئی روز سے گلگت بلتستان کے مختلف اضلاع میں بھر پور انتخابی مہم چلا رہے ہیں، انہوں نے تحریک انصاف کی حکومت پر تنقید کرتے ہوئے کہا کہ لوگوں کو دکھائی دے رہا ہے کہ آپ نے پاکستان کے ساتھ کیا کیا؟
بلاول بھٹو نے کہا کہ تحریک انصاف کی حکومت نے مہنگائی اور بے روز گاری میں اضافہ کیا، عوام احتجاج کر رہے ہیں، آج تاریخی بے روزگاری ہے اور ملک کا ہر طبقہ احتجاج کر رہا ہے۔
ان کا کہنا تھا کہ ہم عوام کو ریلیف دیتے ہیں جبکہ حکومت امیروں کو ریلیف دے رہی ہے اور طبقہ امرا کیلئے ایمنیسٹی اسکیم لا رہی ہے
بلاول بھٹو نے پیپلزپارٹی کے دور حکومت میں ہونے والے متعدد فلاحی کاموں کا حوالہ بھی دیا۔
انہوں نے گلگت بلتستان کو صوبہ بنانے کے حوالے سے حکومت سے استفسار کیا کہ ان کے منشور میں گلگلت کو صوبہ بنانے کی بات کیوں نہیں، اگر گلگت بلتستان کو صوبہ بنانا ہے تو پھر سپریم کورٹ سے پیٹیشن واپس کیوں نہیں لیتے؟
انہوں نے گلگت بلتستان کو صوبہ بنانے کے حوالے سے مزید کہا کہ پیپلزپارٹی گلگت بلتستان کو صوبے کا درجہ دلائے گی۔
بلاول بھٹو نے تحریک انصاف کی حکومت کو تنقید کا نشانہ بناتے ہوئے کہا کہ میں جانتا ہوں کہ اگر شہیدوں کی سرزمین کے عوام ہمارے ساتھ ہیں تو کوئی طاقت ہمارا راستہ نہیں روک سکتی، جب غذر کے عوام نے شہادتیں دیں تو ان کا حق ہے کہ اپنی کی قسمت کا فیصلہ وہ خود کریں۔
انہوں نے کہا کہ ہم نہ صرف پیپلزپارٹی کو گلگت بلتستان سے جتوا کر کٹھ پتلی کو ناکام کریں گے بلکہ جنوری میں اسلام آباد پہنچ رہے ہیں اور کٹھ پتلی وزیراعظم کو گھر بھیج دیں گے۔
