بالی ووڈ اداکار فراز خان طویل عرصہ تک بیمار رہنے کے بعد انتقال کر گئے ہیں۔
بھارتی میڈیا رپورٹس کے مطابق اداکار طویل عرصے سے دماغ کے انفیکشن میں مبتلا تھے۔
فلم ساز پوجا بھٹ نے اپنے ٹویٹر پیغام کے ذریعے ٘مداحوں کو اداکار کے مرنے کی خبر دی۔
اپنے ٹویٹر پیغام میں پوجا بھٹ کا کہنا تھا کہ مجھے دکھی دل کے ساتھ بتانا پڑ رہا ہے کہ فراز خان اس دنیا میں نہیں رہے۔
انہوں نے مداحوں کا شکریہ ادا کرتے ہوئے کہا کہ آپ سب کی نیک خواہشات مشکل وقت میں ان کے ساتھ تھیں۔
انہوں نے فراز خان کے گھر والوں کے لیے دعاوں کی درخواست کی۔
گزشتہ ماہ پوجا بھٹ نے اپنے ٹویٹر پیغام میں لکھا تھا کہ فراز خان کی صحت بہتری کی جانب گامزن ہے اور وہ پہلے سے بہت بہتر محسوس کر رہے ہیں۔
انہوں نے اپنے ٹویٹر پیغام میں اداکار کی صحت کے لیے بھیجے گئے فنڈز کے لیے مداحوں کا شکریہ ادا کیا تھا۔
گزشتہ ماہ فراز خان کے ڈاکٹرز نے انکشاف کیا تھا کہ اداکار دماغ کے انفیکشن میں مبتلا تھے، یہ انفیکشن ان کی چھاتی سے شروع ہوا تھا۔
ڈاکٹرز کے مطابق انہیں دماغ کے انفیکشن کی وجہ سے لگاتار تین دورے پڑے بعد ازاں ان دوروں کی وجہ سے انہیں نمونیا جیسے مرض کا بھی سامنا کرنا پڑا۔
فراز خان بنگلورو کے وکرام اسپتال میں زیر علاج تھے، فلم ساز پوجا بھٹ نے ان کے معاشی حالات ٹھیک نا ہونے کے سبب مداحوں سے فنڈز اکھٹے کرنے کی درخواست کی تھی۔
پوجا بھٹ کی درخواست کے بعد اداکار سلمان خان نے ان کے اسپتال کے سارے بل بھر دیے تھے۔
46 سالہ فراز خان اداکار یوسف خان کے صاحبزادے تھے۔ فراز خان جولائی 1974 میں ممبئی میں پیدا ہوئے۔
کئی ٹی وی شوز میں اپنی اداکاری کے جوہر دکھانے والے فراز خان نے 1998 میں ریلیز ہونے والی رانی مکر جی کی فلم مہندی میں بھی کردار ادا کیا۔
اس سے قبل 1996 میں وکرام بھٹ کی مشہور فلم فریب میں اہم کردار ادا کیا۔ فلم فریب میں ان کی اداکاری کو بہت سراہا گیا۔
