راحت فتح یوٹیوب پر مقبول ترین پاکستانی گلوکار، سبسکرائبرز کی تعداد 50 لاکھ

عالمی شہرت یافتہ پاکستانی گلوکار استاد راحت فتح علی خان نے منفرد اعزاز اپنے نام کر لیا ہے۔

اسٹریمنگ ویب سائٹ یوٹیوب پر ان کے چینل کے 50 لاکھ سبسکرائبرز ہو گئے، یوں وہ سب سے زیادہ سبسکرائبرز والے پہلے پاکستانی موسیقار بن گئے ہیں۔

واضح رہے راحت فتح علی خان کے متعدد گانوں کو یوٹیوب پر 50 لاکھ سے زائد باردیکھا جا چکا ہے، اسی طرح کچھ گانوں کو ایک کروڑ بار جبکہ ان کے ایک گانے ‘ضروری تھا’ کو اب تک ایک ارب سے بھی زائد بار دیکھا جا چکا ہے۔

پاکستانی گلو کار نے اگرچہ ایک دہائی قبل یوٹیوب پر اپنا چینل متعارف کرایا تھا تاہم انہوں نے کم عمری سے ہی گلو کاری کی شروعات کی تھی۔

استاد نصرت فتح علی خان کی وفات کے بعد سب سے زیادہ راحت فتح علی خان کو شہرت ملی اور شائقین کی طرف سے انہیں استاد نصرت فتح علی خان کی آواز قرار دیا گیا۔

راحت فتح علی خان اب تک 50 لاکھ سے زائد میوزک البم ریلیز کر چکے ہیں جبکہ وہ بھارتی فلموں میں بھی سو سے زائد گانے گا چکے ہیں۔

راحت فتح علی خان نے میوزک کے علاوہ درجنوں سنگل گانے ریلیز کئے، انہوں نے قوالی سمیت نعتیہ اور حمدیہ کلام بھی ریلیز کئے۔

یوٹیوب پر 50 لاکھ سبسکرائبرز مکمل ہو جانے کے موقع پر انہوں نے مختصر ویڈیو میں مداحوں کا شکریہ ادا کیا اور کہا کہ انہیں یہ اعزاز مداحوں کی بدولت ہی ملا ہے۔

یاد رہے استاد راحت فتح علی خان نے اس سے پہلے بھی متعدد ایواڑ اور اعزاز اپنے نام کر رکھے ہیں اورنہ صرف پاکستان بلکہ پوری دنیا میں ان کے خاص انداز میں گائے گئے گانوں کو پسند کیا جاتا ہے۔