مسلم لیگ (ن) کی رہنما مریم نواز نے کہا ہے کہ ہمیں معلوم ہے وزیراعظم مجبور ہے کیونکہ وہ خود کسی کی نوکری کرتا ہے۔
اسکردو میں جلسے سے خطاب میں مریم نواز نے مزید کہا کہ 50 لاکھ گھر بنانے اور ایک کروڑ نوکریاں دینے کا وعدہ جھوٹا ہے۔
انہوں نے وزیراعظم کو مخاطب کرتے ہوئے کہا کہ تمہارا ہر وعدہ جھوٹا ہے تمہارا گلگت بلتستان کو صوبہ بنانے کا وعدہ فریب ہے، اس چالاکی کو گلگت کے عوام بخوبی جانتے ہیں۔
اپنے خطاب میں ان کا کہنا تھا کہ جو منہ پر ہاتھ پھیر کر بات کرتا ہے یہ جانے والا ہے، حکومت کی پریشانی بلا وجہ نہیں بلکہ یہ حکومت جاتی نظر آ رہی ہے، اسے آخری دھکا گلگت کے عوام لگائیں گے۔
مریم نواز نے مسلم لیگ ن کے ترقیاتی کاموں کا ذکر کرتے ہوئے کہا کہ نواز شریف نے آپ کو سڑکیں اور یونیورسٹیاں دیں تو وہ آپ کا حق ہے۔
ان کا کہنا تھا کہ عوام کے نمائندے جیلوں میں بھی جاتے ہیں اور ظلم بھی سہتے ہیں لیکن عوام کی خدمت سے پیچھے نہیں ہٹتے۔
مریم نواز نے کہا نواز شریف ایک انسان کا نام نہیں بلکہ ایک وعدے کا نام ہے جو 70 سال کی عمر میں عوام کے حقوق کیلئے چٹان کی طرح کھڑا ہے۔
انہوں نے کہا کہ پاکستانی فوج کی دل سے قدر کرتے ہیں لیکن ان کی جگہ ہمارے دلوں اور سرحدوں پر ہے، فوج کی جگہ پولنگ اسٹیشن میں نہیں ہے۔
مریم نواز نے یہ بھی کہا کہ حکومت گرانے یا بنانے کا اختیار کسی ادارے یا چند افراد کو نہیں بلکہ اس کا اختیار صرف عوام کو ہے۔
انہوں نے تنبیہ کرتے ہوئے کہا کہ اگر گلگت بلتستان میں ووٹ چوری ہوا تو تماشہ پوری دنیا دیکھے گی۔
