ارکان اسمبلی کے اثاثوں کی تفصیلات، وزیراعظم کے اثاثوں میں کمی

اسلام آباد: پاکستان میں انتخابات کے نگران ادارے الیکشن کمیشن آف پاکستان نے ارکان پارلیمنٹ کے اثاثوں کی تفصیلات جاری کر دی ہیں۔
ای سی پی کی جانب سے جاری کی گئی تفصیلات کے مطابق وزیر اعظم عمران خان آٹھ کروڑ سے زائد کے اثاثوں کے مالک ہیں۔
ای سی پی کے مطابق گزشتہ سال عمران خان کی جانب سے ظاہر کیے گئے اثاثے 10 کروڑ 82 ہزار کے لگ بھگ تھے۔
رپورٹس کے مطابق وزیر اعظم کے رواں سال کے اثاثوں میں گزشتہ سال کے مقابلے میں دو کروڑ روپے سے زیادہ کی کمی دیکھنے میں آئی ہے۔
الیکشن کمیشن کے مطابق وزیر اعظم کا پاکستان میں کوئی ذاتی کاروبار نہیں ہے، بتایا گیا ہے کہ عمران خان کی پاکستان میں کوئی ذاتی گاڑی نہیں ہے۔
تفصیلات کے مطابق وزیراعظم کے اثاثوں میں دو لاکھ الیت کی چار بکریاں ظاہر کی گئی ہیں۔
ای سی پی نے بتایا ہے کہ وزیراعظم کے اثاثوں کے مطابق ان کا بیرون ملک بھی کوئی کاروبار یا زاتی گاڑی نہیں ہے۔
ان کے چار غیرملکی اکاونٹس میں تین لاکھ 31 ہزار 230 امریکی ڈالرز موجود ہیں۔
ایک اکاونٹ میں 518 پاونڈز موجود ہیں، رپورٹ کے مطابق وزیر اعظم کے پاس ایک کروڑ 99 لاکھ سے زائد کیش بھی موجود ہے۔
سینیٹر سراج الحق
امیر جماعت اسلامی سینیٹر سراج الحق نے اپنے اثاثوں میں 12 کنال کی وراثتی زمین ظاہر کی ہے۔ انہوں نے تین لاکھ 61 ہزار روپے سے زائد کا کاروبار بھی اثاثوں کا حصہ ظاہر کیا ہے۔
انہوں نے بتایا ہے کہ ان کے اکاونٹ میں چھ لاکھ روپے موجود ہیں۔
سراج الحق سب سے کم اثاثے رکھنے والے سیاستدانوں میں شمار ہوتے ہیں۔
اعظم خان سواتی
وفاقی وزیر اعظم خان سواتی نے 81 کروڑ سے زائد کے اثاثے ظاہر کیے ہیں جس کے بعد وہ امیر ترین سیاست دانوں کی فہرست میں نام بنا چکے ہیں۔
سینیٹر تاج محمد آفریدی
ان کا شمار بھی سینیٹ کے امیر ترین ارکان میں ہے، انہوں نے ایک ارب 22 کروڑ 27 لاکھ روپے کے اثاثے ظاہر کیے ہیں۔
ان کے بیرون ممالک 16 کروڑ 71 لاکھ روپے کے اثاثے سامنے آئے ہیں۔
ارکان اسمبلی کے اثاثے
شہباز شریف
سابق وزیراعلیِ پنجاب شہباز شریف نے اپنے بینک اکاونٹ میں چھ کروڑ 39 لاکھ روپے ظاہر کیے ہیں، ان کے 13 کروڑ 78 لاکھ کے اثاثے بھی سامنے آئے ہیں۔
ان کے اثاثوں کی مجموعی قیمت 24 کروڑ 74 لاکھ بنتی ہے۔
لاہور میں موجود شہباز شریف کے 14 بینک اکاونٹس میں انہوں نے 13 کروڑ 60 لاکھ روپے کے اثاثے ظاہر کیے ہیں۔
نور عالم خان
تحریک انصاف کے نور عالم خان تین ارب 20 کروڑ اور وزیر توانائی عمر ایوب خان ایک ارب 21 کروڑ روپے سے زائد کے اثاثوں کے مالک ہیں۔
آصف زرداری
سابق صدر آصف علی زرداری نے 60 کروڑ روپے سے زائد مالیت کے اثاثے ظاہر کیے ہیں۔
بلاول بھٹو
چیئرمین پیپلز پارٹی ایک ارب 50 کروڑ روپے سے زائد مالیت کے اثاثوں کے مالک ہیں۔