لاہور: صوبائی دارالحکومت لاہور کی احتساب عدالت نے شہباز شریف اور دیگر ملزمان پر فرد جرم عائد کر دی ہے۔
میڈیا رپورٹس کے مطابق احتساب عدالت کے جج جواد الحسن نے منی لانڈرنگ ریفرنس میں شہباز شریف سمیت دیگر ملزمان پر فرد جرم عائد کی۔
رپورٹس کے مطابق ملزمان نے صحت جرم سے انکار کر دیا ہے۔
شہباز شریف نے اپنے بیان میں کہا ہے کہ مجھ پر جھوٹے الزامات عائد کیے جا رہے ہیں۔
انہوں نے نیب کے تمام الزامات کو مسترد کرتے ہوئے کہا کہ مجھے سیاسی انتقام کا نشانہ بنایا جا رہا ہے۔
انہوں نے کہا کہ مجھ پر جن کیسز میں فردجرم عائد کی گئی ان میں کوئی سچائی نہیں ہے
عدالتی ذرائع کے مطابق شہباز شریف کی عدالت میں پیشی کے دوران لیگی کارکنان نے پولیس اہلکاروں کے ساتھ ہاتھا پائی بھی کی، جس کے بعد لیگی کارکنان کو گاڑی کے سامنےسے ہٹا کر شہباز شریف کو عدالت پہنچایا گیا۔
شہباز شریف کے صاحبزادے حمزہ شہباز کو بھی بکتر بند گاڑی میں عدالت پہنچایا گیا جس پر لیگی رہنما خواجہ آصف نے ناراضگی کا اظہار کیا۔
اپنے بیان میں خواجہ آصف کا کہنا تھا کہ حکومت ظلم کر رہی ہے۔
انہوں نے کہا کہ حکومت کے یہ ظلم کب تک جاری رہیں گے، ظلم کی یہ رات ختم ہونے والی ہے۔
احتساب عدالت نے 26 نومبر تک سماعت ملتوی کر دی ہے اور آئندہ سماعت پر نیب کے تین گواہان کو طلب بھی کر لیا ہے۔
