آئی پی ایل کا فائنل جیتنے والی ٹیم ممبئی انڈینز کے کھلاڑی کرونل پانڈیا کو ایئرپورٹ حکام نے قیمتی اور لگژری گھڑیاں رکھنے پر ایئرپورٹ پر ہی روک لیا۔
بھارتی میڈیا کے مطابق کرونل پانڈیا دبئی میں آئی پی ایل کے میچز کھیلنے کے بعد بھارت واپس آرہے تھے جب انہیں ممبئی ایئرپورٹ پر روکا گیا۔
بھارتی خبررساں ادارے اے این آئی نے اپنے ٹویٹر اکاونٹ پر کرکٹر کو روکے جانے کی تصدیق کی۔
اے این آئی کے مطابق کرونل پانڈیا کو ڈائریکٹوریٹ آف ریونیو انٹیلی جینس کے حکام نے کھلاڑی کو سونا اور دیگر قیمتی اشیاء پاس رکھنے پر روکا۔
ایئرپورٹ حکام کے مطابق پانڈیا کے پاس ایک لاکھ 15 ہزار ڈالر (ایک کروڑ 81 لاکھ پاکستانی روپے) کی مالیت کی سونے کی گھڑیاں تھیں جو ان کی کسٹم کی حد سے کافی زیادہ تھیں۔
بھارتی میڈیا کے مطابق کرونل پانڈیا نے ایئرپورٹ حکام کو بتایا کہ وہ ایئرپورٹ کے قواعد و ضوابط سے ناواقف تھے اور وہ اس کے لیے جرمانہ دینے کو تیار ہیں۔
کرونل پانڈیا اور ایئرپورٹ حکام کی جانب سے واقعے پر کوئی تبصرہ نہیں کیا گیا۔
کرونل پانڈیا بھارت کے معروف کرکٹر ہردیک پانڈیا کے بھائی ہیں اور انہیں اکثر تصویروں میں بھی زیورات پہنے دیکھا جا سکتا ہے۔
یاد رہے بھارت کو دنیا کا دوسرا بڑا سونے کا خریدار کہا جاتا ہے، بھارت میں مرد حضرات فضائی سفر کے دوران 670 ڈالر کی مالیت کا سونا بطور ڈیوٹی فری ساتھ لا سکتے ہیں، جبکہ خواتین اس سے دوگنا سونا بغیر ڈیوٹی دیے لا سکتی ہیں۔
میڈیا رپورٹس کے مطابق 2016 میں امپورٹ ڈیوٹی میں اضافے کے بعد سونے کی اسمگلنگ میں اضافہ دیکھنے میں آیا تھا۔
