اداروں سے کہتی ہوں عمران خان کے پیچھے سے ہٹ جائیں، مریم نواز

پاکستان مسلم لیگ ن کی نائب صدر مریم نواز کا کہنا ہے کہ میں اداروں سے کہتی ہوں کہ عمران خان کے پیچھے سے ہٹ جائیں۔

جمعے کو گراسی گراؤنڈ سوات میں جلسے سے خطاب کرتے ہوئے مریم نواز کا کہنا تھا کہ ادارے پیچھے ہٹ جائیں تو یہ حکومت 24 گھنٹے نہیں رہ سکے گی۔

انہوں نے کہا کہ عوام دشمن حکومت نواز شریف کے بیانیے کے نیچے دب چکی ہے، اسے ایک آخری دھکا لگانے کی ضرورت ہے۔

انہوں نے کہا کہ اس ملک کو لاحق بیماریوں کا ایک ہی حل ہے کہ جعلی حکومت کو گھر بھیجو۔

مریم نواز کا کہنا تھا کہ سلیکٹڈ وزیراعظم خوامخواہ اچھل رہا ہے، اسے کوئی پوچھتا تک  نہیں، جب کراچی کے ہوٹل میں میرے کمرے کا دروازہ توڑا کر کیپٹن (ریٹائرڈ) صفدر کو گرفتار کیا گیا، آئی جی کو اغوا کیا تو یہ مزے سے بنی گالہ میں سو رہے تھے۔

مریم نواز نے کہا کہ کسی نے وزیراعظم کو بتانا مناسب نہیں سمجھا کہ ہم کیا کرنے جا رہے ہیں۔

انہوں نے اپنے خطاب میں وزیراعظم کو تنقید کا نشانہ بناتے ہوئے کہا کہ کہتا تھا کہ احستاب مجھ سے شروع کرو، پھر اسی نے احتساب کمیشن کو تالا لگا دیا۔

انہوں نے کہا کہ عمران خان کو احتساب کا سامنے کرنے کے لیے نواز شریف جیسا جگر چاہیے۔

انہوں نے جلسے کے شرکاء سے پوچھا کہ مالم جبہ سکینڈل کو جانتے ہو نا، بلین ٹری سونامی منصوبہ کہاں گیا؟ کہیں 10 درخت بھی لگے نظر آتے ہیں؟

انہوں نے بتایا کہ آڈیٹر جنرل کی رپورٹ کے مطابق درختوں کی مد میں اربوں روپے ہڑپ کیے گئے ہیں۔