بالی ووڈ میں منشیات کے اسکینڈل کی تحقیقات وسیع ہوتی جا رہی ہیں اور بڑے بڑے اداکاروں اور فلمسازوں کے متعلق الزامات لگ رہے ہیں۔
بھارت کے نارکوٹکس کنٹرول بیورو (این سی بی) نے معروف اداکار ارجن رامپال کو تحقیقات کے لیے طلب کیا، ان کی 7 گھنٹوں تک تفتیش کی گئی۔
ہندوستان ٹائمز کے مطابق این سی بی نے 11 اور 12 نومبر کو ارجن رامپال کی گرل فرینڈ گیبریلا ڈیمٹریڈس سے پوچھ گچھ کی تھی جبکہ ان کے دوست پال بارٹل گرفتار ہو چکے ہیں۔
رامپال نے رپورٹرز سے بات کرتے ہوئے کہا کہ میرا منشیات سے کوئی تعلق نہیں ہے، میری رہائش گاہ سے دوائیوں کا ایک نسخہ ملا تھا جسے این سی بی کے حوالے کیا گیا ہے۔
انہوں نے بتایا کہ میں این بی سی کے حکام سے تعاون کر رہا ہوں، یہ ادارہ بہت اچھا کام کر رہا ہے۔
این بی سی حکام نے تصدیق کی ہے کہ رامپال کے غیرملکی دوست پال بارٹل کو جمعرات کو گرفتار کیا گیا تھا۔
ایجنسی نے رامپال کی رہائش گاہ کی تلاشی لی تھی اور ان کا لیپ ٹاپ، موبائل فون اور ٹیبلٹس اپنے قبضے میں لے لی تھی، انہوں نے اداکار کے ڈرائیور سے بھی پوچھ گچھ کی تھی۔
رامپال کی رہائشگاہ کی تلاشی سے ایک روز قبل این بی سی نے بالی ووڈ کے پروڈیوسر فیروز ناڈیاڈ والا کی اہلیہ کو گرفتار کیا تھا، ادارے کو ان کے پاس سے گانجا ملا تھا۔ بعد میں انہیں ضمانت پر رہائی مل گئی۔
اداکار سشانت سنگھ کی خودکشی کے بعد این بی سی نے بالی ووڈ میں منشیات کے حوالے سے وسیع پیمانے پر تحقیقات شروع کی تھیں، اداکار کی گرل فرینڈ ریا چکرابورتی کو بھی گرفتار کیا گیا تھا۔
