اسلام آباد: امریکی ڈالر روپے کے مقابلے میں ایک بار پھر مہنگا ہو گیا ہے جس کے بعد انٹربینک میں ایک ڈالر 160 روپے 20 پیسے میں فروخت ہوا۔
اسٹیٹ بینک آف پاکستان کے اعداد و شمار کے مطابق ڈالر کی اڑان ایک بار پھر اونچی ہو گئی ہے۔ مارکیٹ میں ڈالر کی قیمت میں ایک روپے 52 پیسے اضافہ دیکھنے میں آیا ہے۔
ایکسچینج کمپنیز ایسوسی ایشن آف پاکستان کا کہنا ہے کہ عالمی مارکیٹ میں ڈالر کے مقابلے میں روپے کی قیمت میں 1.95 کی گراوٹ دیکھی گئی۔
اسٹاک مارکیٹ کے مطابق گزشتہ روز ڈالر آج کے مقابلے میں دو روپے سستا فروخت ہوا تھا، ڈالر کی گزشتہ روز کی قیمت 158 روپے 25 پیسے تھی۔
معروف کاروباری کمپنی عارف حبیب گروپ کے رکن ثنا توفیق نے نجی ٹی وی چینل سے بات کرتے ہوئے بتایا کہ گزشتہ دو ہفتوں کے دوران پاکستانی روپے ک قیمت متوازن رہی ہے لیکن اب یہ 1.5 روپے تک گر گیا ہے۔
انہوں نے بتایا کہ کاروبار کے دوران ڈالر کی قیمت 160 روپے تک بھی گئی تھی۔
انہوں نے بتایا کہ آئی ایم ایف کی جانب سے دورہ پاکستان اور مذاکرات کی خبر سامنے آنے کے بعد درآمد کنندگان پریشان ہوگئے تھے جس کے بعد انہوں نے اپنی درآمدات میں کمی کر لی تھی۔
اس سے قبل وزیراعظم کے مشیر خزانہ ڈاکٹر عبدالحفیظ شیخ بھی عالمی مالیاتی بینک کے وفد کے دورہ پاکستان کی تصدیق کر چکے ہیں۔
یاد رہے کہ 13 نوممبر کو ڈالر کی قیمت 158 روپے 16 پیسے تھی، جو 26 اگست کو 168 روپے 44 پیسے کی کم تر سطح پر جانے کے بعد 6.1 روپے کی بہتری تھی۔
معروف سافٹ ویئر اور ڈیٹا کمپنی بلوم برگ کی جانب سے جاری اعدادوشمار میں بتایا گیا تھا کہ روپیہ ایشیا میں بہتر کارکردگی دکھانے والی تیسری کرنسی ہے جبکہ جنوبی کوریا کا وون اور انڈونیشیا کا روپیہ بالترتیب پہلے اور دوسرے نمبر پر ہیں۔
ڈالر کی اونچی اڑان، ایک روپے 52 پیسے مہنگا ہو گیا
