بابر اعظم، دنیائے کرکٹ میں سب سے زیادہ موضوع بحث کھلاڑی

پاکستان سپرلیگ کے فائنل میں 63 رنز کی ناقابل شکست اننگز کھیلنے والے بابر اعظم نے جہاں ٹیم کو میچ جیتنے کے لیے راہ ہموار کی وہیں انہوں نے متعدد ریکارڈز اپنے نام لکھوا لیے ہیں۔
پی ایس ایل کی ٹیم کراچی کنگز کو رواں سال کا چیمپیئن بنانے میں مدد دینے والے بابر اعظم اس وقت دنیائے کرکٹ میں سب سے زیادہ موضوع بحث نام بن چکے ہیں۔
دو حصوں میں مکمل ہونے والے ٹورنامنٹ کے دوران انہوں نے 473 رنز بنا کر مین آف ٹورنامنٹ کو اعزاز ابھی اپنے نام کیا ہے جس کے بعد وہ رواں سال سب سے زیادہ ٹی ٹونٹی رنز بنانے والے کھلاڑی بھی بن گئے ہیں۔
پورے ٹورنامنٹ کے دوران بابر اعظم تین مرتبہ مین آف دی میچ کا اعزاز بھی لے اڑے تھے۔
بابر اعظم نے 32اب تک میچز میں 56.45 کی ایوریج اور 136.63 کے اسٹرائیک ریٹ سے 1242 رنز بنائے ہیں۔
فہرست میں دوسرے نمبر پر بھارتی کھلاڑی لوکیش راہول موجود ہیں جو 993 رنز بنا کر ان سے کافی پیچھے ہیں۔
تیسرے نمبر پر مارکس اسٹوئنس ہیں جو اب تک 986 رنز بنا چکے ہیں، اب تک کی صورتحال کے مطابق بابر اعظم نے ٹاپ کھلاڑی کے طور پر اپنی پوزیشن کو مستحکم کر لیا ہے۔
بابر اعظم کے ریکارڈ کو توڑنے کے لیے دوسرے اور تیسرے نمبر پر موجود کھلاڑیوں کو کافی محنت کی ضرورت پڑے گی۔
انگلش ٹیم کے سابق کپتان ناصر حسین نے اپنے پیغام میں بابر اعظم کو خراج تحسین پیش کرتے ہوئے کہا ہے کہ بابر اعظم نے کسی بھی دوسرے کھلاڑی کی نسبت زیادہ اچھی بیٹنگ کی ہے۔
انہوں نے کہا کہ یہ بیٹنگ بابر اعظم کی کلاس ہے۔
ویسٹ انڈیز کے سابق عظیم کرکٹر ای ین بشپ نے اپنے ٹویٹر پیغام میں صرف بابر اعظم کا نام تحریر کیا اور آگے کا پیغام خالی چھوڑ دیا، جو ان کی طرف سے بابر اعظم کو خراج تحسین ہے۔
یاد رہے پاکستان سپر لیگ کے فائنل میچ میں کراچی کنگز نے لاہور قلندرز کو پانچ وکٹوں سے شکست دے کر ٹورنامنٹ کا تاج اپنے سر سجا لیا تھا۔