اسلام آباد: گلگت بلتستان میں ہونے والے انتخابات کے بعد جہاں اپوزیشن جماعتیں دھاندلی کا الزام عائد کر رہی ہیں، وہیں الیکشن میں سب سے زیادہ نشستیں حاصل کرنے والی پاکستان تحریک انصاف حکومت سازی کی کوشش میں مصروف ہے۔
میڈیا کے مطابق انتخابات میں کامیابی حاصل کرنے والے 4 آزاد اراکین اسمبلی نے پی ٹی آئی میں شمولیت کا اعلان کر دیا ہے۔
ان آزاد امیدواروں نے وفاقی وزیر علی امین گنڈا پور، سیف اللہ نیازی اور ارشد داد سے ملاقات کے بعد یہ اعلان کیا ہے، پی ٹی آئی میں شامل ہونے والے نومنتخب ارکان میں وزیر محمد سلیم، ناصر علی خان، مشتاق حسین اور حاجی عبدالحمید شامل ہیں۔
وزیر محمد سلیم جی بی 9 سے آزاد حیثیت میں منتخب ہوئے جبکہ ناصر علی خان جی بی 10 نے گلگت بلتستان الیکشن میں کامیابی حاصل کی تھی۔
گلگت بلتستان کی 24 نشستوں میں سے 9 پر پاکستان تحریک انصاف کو کامیابی حاصل ہوئی ہے جبکہ 3 پر پیپلزپارٹی کے امیدوار کامیاب ہوئی ہیں، مسلم لیگ ن کے 2 اور جے یو آئی (ف) اور ایم ڈبلیو ایم کاایک ایک امیدوار فتح اپنے نام کرسکا۔
